სამტრედიის სათნოების სახლიდან საავადმყოფოში კიდევ ორი მოხუცი გადაიყვანეს

წუხელ სამტრედიის წმიდა ქეთევანის სახელობის სათნოების სახლიდან საავადმყოფოში კიდევ ორი მოხუცი გადაიყვანეს. როგორც "ინტერპრესნიუსს" სამტრედიის საკრებულოს თავმჯდომარემ ემზარ შუბლაძემ განუცხადა, გვიან ღამით, დაახლოებით 01:00 საათზე, სათნოების სახლიდან ქუთაისის ინფექციურ საავადმყოფოში ორი ბენეფიციარი გადაიყვანეს, რომელთაც ტემპერატურის მატება აღენიშნებოდათ. ამასთან, საავადმყოფოში რჩება ოთხი მობინადრე, რომელთა ჯანმრთელობის მდგომარეობა,  ემზარ შუბლაძის ინფორმაციით, მკურნალობას ექვემდებარება.

სამტრედიის წმიდა ქეთევანის სახელობის სათნოების სახლში 12-13 თებერვალს ხუთი ბინადარი გარდაიცვალა. მათი გარდაცვალება, ერთ-ერთი ვერსიით, რესპირატორულმა ინფექციამ გამოიწვია.

ამასთან, როგორც "ინტერპრესნიუსს" დაავადებათა კონტროლის ეროვნული ცენტრის დირექტორმა, ამირან გამყრელიძემ განუცხადა, ამ ეტაპზე სათნოების სახლის მობინადრეების გარდაცვალების ზუსტი მიზეზი უცნობია. ერთ-ერთ ვერსიად რესპირატორული ინფექციები განიხილება. მისივე ინფორმაციით, ყველა გარდაცვლილი 80 წელს გადაცილებული ბენეფიციარია.

დაავადებათა კონტროლის ეროვნული ცენტრის დირექტორის ცნობით, ოთხი ბენეფიციარი ქუთაისის ინფექციურ საავადმყოფოშია გადაყვანილი, სამი პირი კი სამტრედიის საავადმყოფოს მეთვალყურეობის ქვეშ იმყოფება.

ამირან გამყრელიძის ინფორმაციით, ამჟამად მიმდინარეობს ბენეფიციარებისა და სათნოების სახლის მომსახურე პერსონალის გამოკვლევა. ცხვირის ნაცხის, სისხლისა და შარდის ანალიზი. მისივე ინფორმაციით, ერთ-ერთ პირს A ტიპის გრიპის ვირუსი დაუდასტურდა.

"ინტერპრესნიუსი"