რას ყვებიან პროკურატურაში დაკითხვის შემდეგ მუხროვანის ამბოხში ბრალდებულები

მუხროვანის ამბოხში ბრალდებულების, ლევან ამირიძის, კობა ოთანაძისა და მუხროვანის ამბოხის შემდეგ სპეცოპერაციისას დაღუპული გია კრიალაშვილის დის, ლია კრიალაშვილის დაკითხვა მთავარ პროკურატურაში გუშინ გვიან საღამოს დასრულდა.

მათ დაკითხვის შემდეგ გამოძიების ინტერესებიდან გამომდინარე, ჟურნალისტებთან დეტალებზე საუბრისგან თავი შეიკავეს. ლევან ამირიძისა და კობა ოთანაძის ინფორმაციით, მათი დაკითხვა მოწმის სტატუსით მოხდა და გამოძიებასთან მათი აყვანის თაობაზე ისაუბრეს.

"გამოძიება დაიწყო, ჩვენ ვთანამშრომლობთ და უფლის წყალობით დადგინდება სიმართლე. ჩვენ ვართ მართლები. რაც იყო სიმართლე, სიმართლეს ვამბობთ. დაგვკითხეს "ორ გვამთან " დაკავშირებით, რომელიც სიცრუეა, მოგონილი იყო, ეს იყო ჭორი ვანო მერაბიშვილისგან, გამოძიება დაადგენს ამას", - აღნიშნა კობა ოთანაძემ.

პროკურატურამ ასევე დაკითხა სპეცოპერაციის შედეგად დაღუპული გია კრიალაშვილის და, ლია კრიალაშვილი. მისი ინფორმაციით, შეკითხვები მუხროვანის ამბოხს შეეხებოდა. როგორც ლია კრიალაშვილმა აღნიშნა, პროკურატურიდან უკმაყოფილო არ გამოსულა, თუმცა გამოძიების ინტერესებიდან გამომდინარე, რაზეც უწყებაში საუბარი იყო, ყველაფერს ვერ იტყვის.

ლევან ამირიძის დაკითხვა მთავარ პროკურატურაში გუშინ 13.00 საათიდან მიმდინარეობდა, კობა ოთანაძის - 15.00 საათიდან, ხოლო ლია კრიალაშვილი პროკურატურაში 17.00 საათიდან იმყოფებოდა.

"ინტერპრესნიუსი"