2 წლის წინ გაურკვეველ ვითარებაში გაუჩინარებული გოგიტა აბულაძის ნათესავებმა და ახლობლებმა, ანაკლია-ზუგდიდის დამაკავშირებელი მთავარი გზა გადაკეტეს. აქტივისტებმა გზაზე კარავი გაშალეს და აცხადებენ, რომ სანამ მათი მოთხოვნა არ შესრულდება, არ დაიშლებიან. ისინი აბულაძის გაუჩინარების გამოძიებას და ირაკლი ღარიბაშვილის, ჯერ შინაგან საქმეთა მინისტრობის პერიოდში დადებული დაპირების შეასრულებას მოითხოვენ, რომლის თანახმადაც, ის აუცილებლად დაადგენდა ახალგაზრდა მამაკაცის გაუჩინარების მიზეზს.
"ზეგ 2 წელი სრულდება, რაც ჩემი შვილის შესახებ არაფერი ვიცი. მითხრან ცოცხალია თუ მკვდარი. წინა ხელისუფლების პირობებში დაიკარგა ჩემი შვილი და ახალმა ხელისუფლებამ ის მაინც დაადგინოს, რა მოხდა", - ამბობს დაკარგულის დედა, ცინარა აბულაძე.
ადგილზე საპატრულო პოლიცია იმყოფება და ოჯახთან მოლაპარაკებას აწარმოებს.
