ქუთაისის ციხეში პატიმრის მიერ პედოფილიაში დადანაშაულების გამო მსჯავრდებულები შიმშილობენ
ქუთაისის #2 საპყრობილეში პედოფილიაში დადანაშაულების გამო მსჯავრდებულები შიმშილობენ.
რამდენიმე დღის წინ, პატიმარმა ერეკლე გურბენიძემ ქუთაისის ციხეში გარდაცვლილი 16 წლის გოგა ძველაიას ადვოკატთან და ოჯახის წევრებთან განაცხადა, რომ მან არასრულწოვანი პატიმრის გარდაცვალების რეალური მიზეზი იცოდა. ძველაიას ადვოკატის ლედი ტუკვაძის ინფორმაციით, ერეკლე გურბენიძე აცხადებს, რომ გოგი ძველაიამ თავი იმიტომ მოიკლა, რომ ის საკანში პედოფილებთან ერთად იხდიდა სასჯელს.
ტუკვაძის თქმით, მსჯავრდებულები აცხადებენ, რომ ისინი ერთ-ერთმა პატიმარმა პედოფილიაში უსაფუძვლოდ დაადანაშაულა და ამისთვის პასუხი უნდა აგოს.
"ერეკლე გურბენიძემ განაცხადა, რომ გოგა ძველაიამ თავი იმიტომ მოიკლა, რომ პედოფილებთან ერთად იჯდა. ასევე მან დაასახელა კონკრეტული პატიმრის გვარები. სწორედ გურბენიძის მიერ დასახელებულმა პატიმრებმა დღეს დამირეკეს და მითხრეს, რომ ეს ბრალდება მათი მისამართით მტკნარი სიცრუეა. აღშფოთებულები არიან და დაიწყეს შიმშილობა. მოშიმშილე პატიმრების თქმით, გურგენიძემ მათი ღირსება შელახა და მან ამისთვის პასუხი უნდა აგოს", - განაცხადა ტუკვაძემ.
შეგახსენებთ, რომ ქუთაისის საპყრობილეში გარდაცვლილი გოგა ძველაიას მამამ 30 დეკემბერს პარლამენტთან შიმშილობა დაიწყო, ის ერეკლე გურბენიძესთან შეხვედრას ითხოვდა და აცხადებდა, რომ გურბენიძემ მისი შვილის გარდაცვალების რეალური მიზეზი იცოდა. გურბენიძესთან შეხვედრის შემდეგ ძველაიას მამამ შიმშილობა შეწყვიტა.
წყარო: topnews.com.ge
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
