ალბათ, მე რომ ქართველი ვიყო, წინააღმდეგი ვიქნებოდი ოლიმპიადაზე წასვლის, განსაკუთრებით მეჩირაღდნის პრეცედენტის შემდეგ, - ამის შესახებ საქართველოში გერმანიის ფედერაციული რესპუბლიკის ელჩმა, ორთვინ ჰენიგმა გაზეთ "კვირის პალიტრასთან" ექსკლუზიურ ინტერვიუში განაცხადა.
ელჩის თქმით, ის მეჩირაღდნის პრეცედენტს პროვოკაციად და შეურაცხყოფად ჩათვლიდა. ორთვინ ჰენიგი აცხადებს, რომ თანაუგრძნობს იმ ქართველებს, ვინც ოლიმპიადის ბოიკოტირებას მოითხოვენ.
"მაგრამ მე ქართველი არ ვარ და შემიძლია ამ საკითხს ნაკლები ემოციით შევხედო. ისტორიას ახსოვს ოლიმპიადის ბოიკოტის მაგალითები, მაგრამ არ მახსენდება შემთხვევა, როდესაც ამან რეალური პოლიტიკური შედეგი მოიტანა. ვფიქრობ, კარგი იქნება, თუ გადაწყვეტილებას ერთბაშად არ მიიღებთ. დააკვირდით საერთაშორისო საზოგადოების რეაქციას და ფხიზელი გონებით გადაწყვიტეთ", - განაცხადა გერმანიის ელჩმა.