ქუთაისის ბიუჯეტმა შესაძლოა სეკვესტრი განიცადოს. ქუთაისის მერიის საფინანსო-სარევიზიო კომისიის მიერ ჩატარებული 6 თვიანი მონიტორინგის შედეგების მიხედვით, ქალაქის მთავარი ფინანსური დოკუმენტი შესრულების ნაწილში დეფიციტს განიცდის. ამის გამო მოსალოდნელია, წლის ბოლოს გეგმასა და შემოსავლებს შორის სხვაობამ 6 მილიონი ლარი შეადგინოს, რაც ბიუჯეტის სეკვესტრს ნიშნავს. სეკვესტრის შემთხვევაში კი, მიმდინარე წლის ქუთაისის ბიუჯეტში გაწერილი პროექტების ნაწილი ვერ შესრულდება.
"უკვე გვაქვს 6 თვის მონიტორინგის შედეგები. სრული გამყინვარების პერიოდი გვაქვს, გეგმის მხოლოდ 38% -ია შესრულებული. თუ ასე გაგრძელდება, სეკვესტრი გარდაუვალია", - ამბობს საფინანსო-სარევიზიო კომისიის თავმჯდომარე, გოგიტა გოგელაშვილი.
