თურქეთის პრემიერ-მინისტრი რეჯეფ ტაიპ ერდოღანი კიდევ ერთხელ მოუწოდებს სტამბოლში შეკრებილ დემონსტრანტებს, გაათავისუფლონ ტაქსიმის მოედანი და "გეზი პარკი". ამის შესახებ AFP იუწყება.
"ახალგაზრდებო, თქვენ საკმაოდ დიდხანს აპროტესტებდით და აფიქსირებდით საკუთარ მოსაზრებას. თუ თქვენი გზავნილი "გეზი პარკის" რეკონსტრუქციას ეხება, ჩვენ გავიზიარეთ და დავაფასეთ თქვენი მოთხოვნა. ვიმედოვნებ, თქვენი გამოსვლები ამაღამ დასრულდება", - განაცხადა თურქეთის პრემიერ-მინისტრმა სატელევიზიო გამოსვლისას.
ერდოღანმა ეს განცხადება ანკარაში, "სოლიდარობა ტაქსიმის" წარმომადგენლებთან შეხვედრიდან რამდენიმე საათში გააკეთა. დემონსტრანტების წარმომადგენელთა შეხვედრისას, თურქეთის პრემიერმა პირობა დადო, რომ რეფერენდუმის გამართვამდე "გეზი პარკის" რეკონსტრუქციის პროექტი შეჩერდება.
თურქეთის სხვადასხვა ქალაქებში მიმდინარე მასობრივი აქციებისას, რომელიც მაისის ბოლოს დაიწყო, პოლიცია თითქმის ყოველდღე არბევდა მომიტინგეებს ცრემლსადენი გაზისა და წყლის ჭავლის გამოყენებით. ბოლო მონაცემებით, შეტაკებების შედეგად დაიღუპა 5 ადამიანი, დაშავდა 5 ათასამდე.
