ჟურნალისტური ეთიკის ქარტია რუსთაველის გამზირზე ინციდენტის გამო შეშფოთებას გამოთქვამს
საქართველოს ჟურნალისტური ეთიკის ქარტია აქციის მონაწილეების დაკავებას ეხმაურება და რუსთაველის გამზირზე მომხდარი ინციდენტის გამო შეშფოთებას გამოთქვამს. ამასთან დაკავშირებით ქარტიის მიერ გავრცელებულ განცხადებას "ინტერპრესნიუსი" უცვლელად გთავაზობთ.
"ჟურნალისტური ეთიკის ქარტია შეშფოთებულია დღეს რუსთაველის გამზირზე მომხდარი ინციდენტით, რომლის დროსაც აქციის ორგანიზატორებთან ერთად სამართალდამცველებმა ჟურნალისტებიც დააკავეს, დაკავებულები არიან ტელეკომპანია "მეცხრე არხის" რეპორტიორი ზვიად ხუჯაძე და ჟურნალ "ლიბერალის" ჟურნალისტი ანი ჭანკოტაძე. ორივე მედიასაშუალება აცხადებს, რომ მათი თანამშრომლები რუსთაველის გამზირზე პროფესიულ საქმიანობას ახორციელებდნენ, და ორივე მათგანმა შინაგან საქმეთა სამინისტროს თანამშრომლებს დაკავებისას განუმარტა, რომ ისინი ჟურნალისტები იყვნენ. რუსთაველის გამზირზე ინციდენტის დროს მყოფი ჟურნალისტები სამართალდამცველების მხრიდან ჟურნალისტურ საქმიანობაში ხელის შეშლის ფაქტებზეც საუბრობენ.
ჟურნალისტური ეთიკის ქარტია მიმართავს სამართალდამცველებს, იმოქმედონ კანონის შესაბამისად, არ შეუშალონ ხელი მედიის წარმომადგენლებს საკუთარი საქმიანობის განხორციელებაში და დროულად განუმარტონ საზოგადოებას, რა სამართლებრივი საფუძველი ედო ჟურნალისტების დაკავებას. ქარტია იმედს გამოთქვამს, რომ შინაგან საქმეთა სამინისტრო დაუყოვნებლივ გაათავისუფლებს დაკავებულ ჟურნალისტებს და მოუწოდებს შესაბამის ორგანოებს, შეისწავლონ პოლიციელთა მხრიდან მედიის წარმომადგენელთა უფლების დარღვევის შესაძლო ფაქტები", - ნათქვამია განცხადებაში.
"იბერიას" ჟურნალისტები განცხადებას ავრცელებენ
უჩა მამაცაშვილი "იბერიასა" და "ომეგა ჯგუფის" ირგვლივ მიმდინარე პროცესებზე პროკურატურას მიმართავს
