ჩეჩნეთის მეთაურმა რამზან კადიროვმა ქვეშევრდომების დასჯის ახალი მეთოდი მოიფიქრა - რინგზე საჩვენებელი ცემა. პირველად ეს მეთოდი საკუთარ თავზე ჩეჩნეთის ფიზიკური კულტურისა და სპორტის მინისტრმა სალამბეკ ისმაილოვმა იწვნია.
ახლახან კადიროვი სამინისტროს სტუმრობდა და იგი შენობის იერსახემ აღაშფოთა. "რატომ აქვს სამინისტროს შენობას ასეთი ძველი შესახედაობა? ორი კვირის განმავლობაში აქ კაპიტალური რემონტი უნდა დასრულდეს, მინისტრი კი დღეს საღამოს ვარჯიშის დროს ჩემი სპარინგ-პარტნიორი გახდება, ამასთან დამცავ ჩაფხუტს დასასჯელად არ მისცემენ!"- დაწერა პრეზიდენტმა Instagram-ში.
მან დაპირება შეასრულა და ფაქტის ამსახველი ფოტოები სოციალურ ქსელში გამოაქვეყნა. "ჩვენი დიალოგის მსვლელობისას (იგულისხმება სპარინგი), მოკრძალებულად მუშტით მარცხნივ და მარჯვნივ განვუმარტე, რომ თავით მუშაობაა საჭირო. საკუთარი შეცდომების გამოსწორება მინისტრმა დღეს საღამოსვე დაიწყო, ამიტომ ჩაფხუტის დახურვის ნება მივეცი. ხვალ სამსახურშიც ხომ უნდა წავიდეს",- მოუყვა მკითხველს კმაყოფილი კადიროვი.
მან ასევ აღნიშნა, რომ რინგს რუსეთის შრომის და სოციალური დაცვის მინისტრი მაქსიმ ტოპილინი და ჩეჩნეთის შრომის მინისტრი მოჰმად ახმადოვი უცქერდნენ. "დაისჯება თუ არა რინგზე ახმადოვი, საბოლოოდ ზეგ თათბირზე გაირკვევა",-დასძინა კადიროვმა.
კადიროვი კრივის ოსტატია და ჩეჩენეთში კრივის ფედერაციას ხელმძღვანელობს.
ისმაილოვი ფიზიკური კულტურისა და სპორტის მინისტრად ამ წლის თებერვალში დაინიშნა.
მომზადებულია newsru.com-ის მიხედვით.
