კახა კალაძე: "მტკვარს მიმართულებას აღარ შეუცვლიან"

მდინარე მტკვარს მიმართულებას აღარ შეუცვლიან, - ამის შესახებ საქართველოს ენერგეტიკის მინისტრმა კახა კალაძემ საპარლამენტო უმცირესობასთან გამართულ შეხვედრაზე განაცხადა, სადაც მას ამასთან დაკავშირებით შეკითხვა ოპოზიციონერმა დეპუტატმა და ყოფილმა გარემოს დაცვის მინისტრმა გოგა ხაჩიძემ დაუსვა.

როგორც კალაძემ განმარტა, იყო გარკვეული კითხვები, რადგან თურქულ მხარეს სურდა ჰიდროელექტროსადგური მთლიანად თავის ტერიტორიაზე კაშხლით აეშენებინა, რის გამოც მდინარე მტკვრის ნაწილობრივ მიმართულების შეცვლა მოხდებოდა.

ენერგეტიკის მინისტრის თქმით, მტკვრისთვის მიმართულების შეცვლას შესაძლოა საქართველოში გარკვეული პრობლემები შეექმნა. თუმცა, როგორც კალაძემ აღნიშნა, მიღწეულია შეთანხმება, რომ მტკვრის მიმართულების შეცვლა არ მოხდება, ამასთან, კაშხალი აშენდება თურქულ მხარეს, სხვა დანარჩენი, მათ შორის აგრეგატები კი - საქართველოს მხარეს.

"ინტერპრესნიუსი"