საგამოძიებო სამსახურში ვანო მერაბიშვილის ბიძის დაკავების პოლიტიკურ მოტივს გამორიცხავენ
ფინანსთა სამინისტროს საგამოძიებო სამსახურში ადასტურებენ, რომ შპს "ტაოს" ხელმძღვანელი ლევან თუმანიშვილი ყოფილი პრემიერის, ვანო მერაბიშვილის ბიძაა.
თუმცა როგორც "ინტერპრესნიუსს" უწყებაში განუცხადეს, "ტაოს" ხელმძღვანელის დაკავების პოლიტიკურ მოტივს კატეგორიულად გამორიცხავენ.
საქართველოს ფინანსთა სამინისტროს საგამოძიებო სამსახურის ინფორმაციით, შპს "ტაოს" ხელმძღვანელ ლევან თუმანიშვილის უშუალო ხელმძღვანელობით საწარმოს თანამშრომლები სამცხე-ჯავახეთის ტყის უბნებში უკანონოდ ჭრიდნენ ხე-ტყეს და მწვანე ნარგავებს, რის შემდეგაც, მოპოვებული ხე მასალა მიჰქონდათ აღნიშნული პირის კუთვნილ გადამამუშავებელ საამქროში. გამოძიების თანახმად, ამ კანონსაწინააღმდეგო ქმედებით გარემოსთვის მიყენებული ზიანის ოდენობა 150 000 ლარით განისაზღვრა.
გამოძიებით ასევე დადგენილია, რომ თუმანიშვილი მოპოვებული სამასალე მერქნის რეალიზაციის დროს, ყალბი საგადასახადო დოკუმენტების დამზადების გზით, სისტემატურად ზრდიდა მიღებული შემოსავლების ხარჯებს, რითაც თავს არიდებდა სახელმწიფო ბიუჯეტში გადასახადების გადახდას.
მიმდინარეობს გამოძიება სისხლის სამართლის კოდექსის 303 - მუხლის პირველი ნაწილით და 210-ე მუხლის მეორე ნაწილით.
დაპირისპირება თბილისის ცენტრში - რამდენიმე მამაკაცი ფიზიკურად გაუსწორდა
"სათამაშო ბიზნესი "ქართულ ოცნებაში" ე.წ. შავ სალაროს ავსებს" - ვინ მფარველობს ონლაინკაზინოებს?
