ლაგოდეხის გამგეობაში მიწისძვრის შედეგად დაზარალებული ოჯახების 700-მდე განცხადებაა რეგისტრირებული. გამგეობის მთავარი სპეციალისტის, ჯონდო კობერიძის განცხადებით, ყველაზე მეტი განცხადება სოფელ ჭიაურიდან არის შესული.
"მოქალაქეები ლაგოდეხის თითქმის ყველა სოფლიდან მოგვმართავენ. მიწისძვრამ ყველაზე მეტად სოფელი ჭიაური დააზარალა, საიდანაც ამ დროისთვის 200-მდე განცხადებაა შემოსული. გამგეობაში 4 ჯგუფია შექმნილი. ისინი სახლებს სურათებს უღებენ და დაზიანებებს იწერენ. ამის შემდეგ აქტები უნდა შედგეს, რომ დაზარალებულებმა შესაბამისი კომპენსაცია მიიღონ. ადგილობრივ ბიუჯეტში ამისთვის თანხები არ გვაქვს და ის ალბათ ცენტრალური ბიუჯეტიდან გამოიყოფა", - აღნიშნა ჯონდო კობერიძემ.
ილიას სახელმწიფო უნივერსიტეტის სეისმური მონიტორინგის ცენტრის ინფორმაციით, 13-დან 18 ოქტომბრამდე ლაგოდეხთან ახლოს მიწისძვრა 8-ჯერ მოხდა.
