ირმა ინაშვილი "პიკ"-ის თანამშრომლებს სიხშირის დაბრუნებისთვის ერთობლივი ბრძოლისკენ მოუწოდებს

"ობიექტივის" ჟურნალისტი ირმა ინაშვილი "პიკ"-ის თანამშრომლებს სიხშირის დაბრუნებისთვის ერთობლივი ბრძოლისკენ მოუწოდებს.

როგორც ინაშვილმა "ინტერპრესნიუსს" განუცხადა, სიხშირე, რომელზეც არხი მაუწყებლობს, თავის დროზე "ობიექტივს" ეკუთვნოდა, თუმცა 2004 წელს ჩამოართვეს.

"სააკაშვილის რეჟიმმა ჯერ კიდევ 2004 წელს წაართვა "ობიექტივს" 35-ე დეციმეტრული სიხშირე, რაზეც თბილისის მასშტაბით ვმაუწყებლობდით და ის ტელეკომპანია "ალანიას" გადასცა. ჩვენი სიმართლე ვერანაირად ვერ დავამტკიცეთ, რის შემდეგაც მივმართე ჟურნალისტური გამოძიების გზას და ის ინტერნეტში დევს. "ალანიას" თემა ძალიან რომ გახმაურდა, ხელისუფლებამ გადაწყვიტა მისთვის სახელწოდება შეეცვალა და კვალი გაექრო, რის გამოც მას უწოდეს "რეგიონ ტვ". ჩვენ, რა თქმა უნდა, ესეც გავაპროტესტეთ და ვთქვით, რომ "რეგიონ ტვ" ჩვენთვის წართმეულ არხზე მაუწყებლობს. ბოლოს 35-ე დეციმიტრული სიხშირე, ანუ იგივე "რეგიონ ტვ" შეუერთდეს "პიკს", - განაცხადა ინაშვილმა.

მისივე განმარტებით, ის "პიკ"-ის ჟურნალისტებს ურჩევს სიხშირის დასაბრუნებლად მასთან ერთად იბრძოლონ, შედეგის მიღწევის შემდეგ კი ყველა პროფესიონალს სამსახურის შენარჩუნების პირობას აძლევს.

"ვეუბნები "პიკ"-ის ჟურნალისტებს, რომლებიც იფიცებიან, რომ ხვალ და ზეგ შეიძლება დაკარგონ სამსახური - მობრძანდით ჩემთან, თუ არ მობრძანდებით, ინტერნეტში ნახეთ ჩემს მიერ ჩატარებული გამოძიება, იბრძოლეთ სიხშირის დაბრუნებისთვის ჩემთან ერთად და გპირდებით, მისი დაბრუნების შემდეგ ყველა პროფესიონალი შეინარჩუნებთ სამსახურს, სიხშირეს კი აუცილებლად დავიბრუნებთ", - აღნიშნა ინაშვილმა.

"ინტერპრესნიუსი"