რას აღიარებს ირაკლი ალასანია და რისთვის სთხოვს ღმერთს შენდობას გიორგი ბარამიძე

ირაკლი ალასანია და გიორგი ბარამიძე ერთი მიზნისთვის სხვადასხვა პოზიციიდან, სხვადასხვა მეთოდით იბრძვიან. როგორც თავად ამბობენ, ორივეს მიზანი - საქართველოს ტერიტორიული მთლიანობის აღდგენა, ეკონომიკურად გაძლიერება და დასავლეთის ცივილიზებულ ერთა ოჯახში გაწევრებაა. ორივე დარწმუნებულია, რომ არჩევნებში გაიმარჯვებს და საკუთარ შესაძლებლობებს ქვეყნის საკეთილდღეოდ გამოიყენებს. ვნახოთ, როგორია "ქართული ოცნების" წარმომადგენლის, ირაკლი ალასანიასა და "ნაციონალი" გიორგი ბარამიძის ბრძოლის მეთოდები და რა აძლევს მათ არჩევნებში გამარჯვების იმედს.

- როგორია თქვენი წინასაარჩევნო განწყობა?

ირაკლი ალასანია, ზუგდიდის მაჟორიტარი დეპუტატობის კანდიდატი:

- გამარჯვებისთვის ვარ განწყობილი. საზოგადოებას ძალიან მარტივი არჩევანი აქვს გასაკეთებელი: ერთ მხარეს არის "ნაციონალური მოძრაობა" ყალბი დაპირებებით, მეორე მხარეს კი - "ქართული ოცნება" კონკრეტული ამოცანებით. ჩვენი ამოცანაა, განვავითაროთ სოფლის მეურნეობა და მიწის ერთი გოჯიც კი არ დავტოვოთ დაუმუშავებელი. დავეხმაროთ სააკაშვილის მიერ დანგრეულ "ჯანდაცვას"... დღეს ადამიანებს მკურნალობა სახლების გაყიდვის ფასად უჯდებათ. ჩვენ ზუგდიდში რეგიონული მასშტაბის სამედიცინო ცენტრის აშენებას ვაპირებთ, სადაც ადგილობრივ მოსახლეობასა და აფხაზებს უფასოდ გაუკეთებენ ოპერაციებს. გამარჯვების იმედს მაძლევს ის, რომ არჩევნებს უცხოელი დამკვირვებლების უზარმაზარი არმია დაესწრება და ამ რეჟიმს ერთი ხმის მოპარვის საშუალებაც არ ექნება.

გიორგი ბარამიძე, ბათუმის მაჟორიტარი დეპუტატობის კანდიდატი:

- განწყობა ძალიან კარგი მაქვს და დარწმუნებული ვარ, რომ გავიმარჯვებთ. ამის რწმენის საფუძველს მაძლევს ამომრჩეველთან გამართული შეხვედრები და "ენდიაისა" და "აირაის" მიერ ჩატარებული წინასაარჩევნო გამოკითხვები. "ნაციონალები" ერთ მუშტად შეკრული პატრიოტთა გუნდი ვართ, რომელმაც 8 წლის განმავლობაში მნიშვნელოვნად შეცვალა ქვეყნის ცხოვრება. ჩვენ დავამარცხეთ კრიმინალური სამყარო, ქურდული მენტალიტეტი, ბოლო მოვუღეთ უშუქობას, უგაზობას, უწყლობას, მნიშვნელოვნად მოვაწესრიგეთ ინფრასტრუქტურა. ახლა ვცდილობთ, დავასაქმოთ მოსახლეობა და დავამარცხოთ სიღარიბე...

- ამომრჩევლები არაფერს გსაყვედურობენ?

ირაკლი ალასანია:

- მე რა უნდა მისაყვედურონ?! ჯერ არასდროს ვყოფილვარ ზუგდიდის მაჟორიტარი დეპუტატი და ცრუდაპირება არავისთვის მიმიცია. ამომრჩევლებს პირობას ვაძლევ, რომ "ნაციონალებისგან" განსხვავებით, იმედს არ გავუცრუებ და ჩემს გუნდთან ერთად შევქმნი სამუშაო ადგილებს, როგორც მცირე და საშუალო ბიზნესის ხელშეწყობით, ისე სოფლის მეურნეობის განვითარებით.

გიორგი ბარამიძე:

- ჩვენ გვერდით ჯერ კიდევ ძალიან ბევრი გაჭირვებულია. სამწუხაროდ, ეკონომიკისა და ინფრასტრუქტურის განვითარებით მიღებული შედეგები ყველას ცხოვრებას ჯერ კიდევ არ დაეტყო. ჯერ კიდევ დაბალია პენსია, პრობლემები არსებობს სამუშაო ადგილების შექმნის თვალსაზრისითაც, მაგრამ მომავალი 4 წლის განმავლობაში სწორედ ამ პრობლემების მოგვარებაზე ვიზრუნებთ.

- ტყუილის თქმა თუ გიწევთ?

ირაკლი ალასანია:

- გავრცელებულია მოსაზრება, თითქოს პოლიტიკა ბინძური საქმეა და თანაც მატყუარების საქმე. "ნაციონალების" ქმედებებიდან გამომდინარე თუ ვიმსჯელებთ, საზოგადოების სკეპტიციზმს საფუძველი აქვს. მე და ჩემი გუნდი სწორედ მატყუარა და ბინძური ხალხისგან პოლიტიკის გასუფთავებას ვისახავთ მიზნად. ჩვენ დავამტკიცებით, რომ პოლიტიკა წესიერი ადამიანების საქმეა.

გიორგი ბარამიძე:

- ისეთი ტყუილი არასდროს მითქვამს, რომ ამას ვინმესთვის ზიანი მიეყენებინოს. როდესაც თავდაცვის მინისტრი ვიყავი და ხშირად ჩავდიოდი ცხინვალში, ზოგჯერ ჯარისკაცებთან ერთად, სანგარშიც ვათენებდი ღამეს. ასეთ დროს ჩემს მეუღლესა და დედაჩემს ვატყუებდი, ვითომ კაბინეტში ან შეხვედრაზე ვიყავი. ყველანაირი ტყუილი - ცოდვაა, მაგრამ იმედია, ასეთ ტყუილებს ღმერთი შემინდობს.

- დაპირებების შესრულებას ყოველთვის ახერხებთ?

ირაკლი ალასანია:

- არადროს მიმიცია ისეთი დაპირება, რომელიც არ შემისრულებია. იგივე შემიძლია ვთქვა ჩვენი კოალიციის ლიდერზეც, რომელსაც ყველაზე დიდი გამოცდილება აქვს სამუშაო ადგილების შექმნის თვალსაზრისით.

გიორგი ბარამიძე:

- თუ 100%-ით არ ვარ დარწმუნებული, რომ ჩემს სიტყვას შევასრულებ, დაპირებას არავის მივცემ. სიტყვის გატეხას მართლა თავის გატეხა მირჩევნია. მხოლოდ ჩემს ქალიშვილს ვერ ვუსრულებ ხოლმე დაპირებას და სასეირნოდ ან კინოში ვერ მიმყავს, ისიც - ძალიან იშვიათად.

- თქვენს ღირსეულ მეტოქედ ვის მიიჩნევთ?

ირაკლი ალასანია:

- "ნაციონალები" წლების განმავლობაში სახელმწიფოს უღირსად მართავდნენ და საკუთარი მოქალაქეების ღირსებას ლახავდნენ, ამიტომ მათში ღირსეულ მეტოქეს ვერ ვხედავ. ამას ყველა "ნაციონალზე" არ ვამბობ; იმ ლიდერებს ვგულისხმობ, რომლებიც პოლიტიკას განსაზღვრავენ.

გიორგი ბარამიძე:

- ყველა ჩვენს ოპონენტს ერთნაირად ვუყურებ. ზოგი ჭკვიანურად იქცევა, ზოგი - არა, ზოგი მიუღებელ განცხადებებს აკეთებს, ზოგი - არა. თუმცა ყველა, ჩემი პოლიტიკური ოპონენტია და ყველასთან ერთნაირი დამოკიდებულება მაქვს.

- ფიქრობთ თუ არა, რომ კომპრომისზე წასვლა უკან დახევის ტოლფასია?

ირაკლი ალასანია:

- ცხოვრებაში წარმატებას ვერ მიაღწევ, თუ კომპრომისზე წასვლა არ შეგიძლია. კომპრომისი და დიალოგი მხოლოდ "ნაციონალებისთვის" არის მიუღებელი. "ქართული ოცნების" გამარჯვების იმედს ისიც მაძლევს, რომ ჩვენ სხვისი აზრის მოსმენა და დათმობა შეგვიძლია.

გიორგი ბარამიძე:

- კომპრომისზე წასვლა სიბრძნის მაჩვენებელია და პოლიტიკოსს ეს თვისება აუცილებლად უნდა ახასიათებდეს. უკან დახევა ზოგჯერ ომშიც კი აუცილებელია. შესაძლოა, ერთი ნაბიჯით უკან იმიტომ დაიხიო, რომ მერე ორი ნაბიჯი წინ გადადგა.

- რას ფიქრობთ პრეზიდენტის მოწოდებაზე ერთიანობის შესახებ და მისი რიტორიკის შერბილებაზე?

ირაკლი ალასანია:

- ეს წინასაარჩევნო ფარსია. თუ დავაკვირდებით სააკაშვილის რვაწლიან პოლიტიკურ მოღვაწეობას, მივხდებით, რომ ამ კაცს არაფერი აქვს საერთო დიალოგთან, კომპრომისთან, თანადგომასთან. ის მთლიანად გაჟღენთილია კაცთმოძულეობით, მოქალაქეების ჩაგვრისა და თავისუფლების შეზღუდვის სურვილით.

გიორგი ბარამიძე:

- ეს გამარჯვებაში დარწმუნებული გუნდის ლიდერისგან ლოგიკური განაცხადია. ჩვენ მზად ვართ, რომ ქვეყნის მართვის პასუხისმგებლობა კიდევ 4 წლის განმავლობაში ვიტვირთოთ. ქვეყანა ჯერ კიდევ გასამთლიანებელია და უნდა გვახსოვდს, რომ შიდა დაპირისპირებას საქართველოსთვის სიკეთე არასდროს მოუტანია.

- ქვეყნის ინტერესებისთვის პირად მტერთან თუ ითანამშრომლებთ?

ირაკლი ალასანია:

- მე ამის მაგალითი საზოგადოებას უკვე მივეცი: აფხაზეთის ომში მამა დავკარგე, მაგრამ აფხაზებთან დიალოგის დაწყება და მათთან ერთად ქართულ-აფხაზური ურთიერთობის მოგვარებაზე ფიქრი მაინც შევძელი.

გიორგი ბარამიძე:

- რა თქმა უნდა. მითანამშრომლია კიდეც. თუ ვიცი, რომ ჩემს მტერთან თანამშრომლობით სამშობლოს ვარგებ, ამაზე არც კი დავფიქრდები.

- აფხაზეთის ომში რომ მიიღეთ მონაწილეობა, ხომ არ ნანობთ?

ირაკლი ალასანია:

- არც ერთი წამით. მე ჩემს ქვეყანას ვიცავდი. მხოლოდ იმას ვნანობ, რომ ქართველები და აფხაზები მესამე ძალის პროვოკაციას წამოვეგეთ.

გიორგი ბარამიძე:

- არა. ძალიან მეცოდება ის ხალხი, ვინც მიიჩნევს, რომ სამშობლოს დაცვა შეცდომა იყო.

- ამბობენ, რომ ადამიანი თავის ნამდვილ სახეს ომში ამჟღავნებს. ზოგი ამ დროს საკუთარ თავში ისეთ თვისებებს აღმოაჩენს ხოლმე, რომლის არსებობის შესახებ მანამდე თავადაც კი არ იცოდა. თქვენ რა თვისებები აღმოაჩინეთ საკუთარ თავში?

ირაკლი ალასანია:

- ახალი არაფერი აღმომიჩენია, ყოველთვის ვიცოდი, რომ ომი ძალიან დიდი უბედურება და ბოროტებაა და საზოგადოების განვითარებას ხელს უშლის. სწორედ ამიტომ გახდა ჩემი ამოცანა ქართულ-აფხაზური ურთიერთობების მოგვარება. ყველაფერს გავაკეთებ იმისთვის, რომ ჩემს ქვეყანაში ახალი ომი ან კონფლიქტი არ დავუშვა.

გიორგი ბარამიძე:

- თვისებები, რომლებიც ომში გამოვავლინე, ალბათ მანამდეც მქონდა, უბრალოდ გამომჟღავნების საშუალება არ მომეცა. მივხვდი, რომ გვერდზე მდგომისთვის თავის გაწირვა შემიძლია. კიდევ უფრო მეტად დავრწმუნდი, რომ სამშობლო ძალიან მიყვარს. ისე, ეს თვისებები მხოლოდ მე არ გამომივლენია, იქ ძალიან ბევრი იყო ისეთი, ვინც სხვის გადასარჩენად საკუთარი სიცოცხლით რისკავდა.

- თუ საჭირო გახდება, ომში ისევ წახვალთ?

ირაკლი ალასანია:

- აუცილებლად. საკუთარი ქვეყნის დაცვა ყველა ჩვენგანის ვალდებულებაა. იარაღის ხელში აღებას მხოლოდ მაშინ აქვს გამართლება, თუ სამშობლოს მომხდურისგან იცავ.

გიორგი ბარამიძე:

- ჩვენ სულ ომში ვართ, უბრალოდ, დღეს ისეთი სახელმწიფო გვაქვს, რომ სამოქალაქო პირს, პოლიტიკოსს ავტომატის ხელში აღება არ სჭირდება. თუმცა, თუ საჭირო გახდება, რიგით ჯარისკაცად წავალ.

- შურისძიებაზე თუ გიფიქრიათ?

ირაკლი ალასანია:

- ეს ადამიანური გრძნობაა და უცხო არავისთვისაა; მთავარია, მისი ჩახშობის სურვილი გქონდეს. ფროიდის სიტყვები გამახსენდა: "ერთადერთი პიროვნება, ვისაც თავი უნდა შეადარო, ეს არის ის, ვინც შენ იყავი გუშინ და ერთადერთი პიროვნება, ვისაც უნდა აჯობო, ეს ხარ შენ დღეს".

გიორგი ბარამიძე:

- როგორ არ მიფიქრია?! ყოველ წუთს ვფიქრობ, მტერზე შური ვიძიო და ჩემს თანამოაზრეებთან ერთად, საქართველო პოლიტიკურად თუ ეკონომიკურად ისე გავაძლიერო, რომ ოკუპანტმა მეზობელმა უბატონოდ ხმა ვერ გაგვცეს. მტრის ჯავრს არ შევჭამ, საქართველო აუცილებლად გახდება ევროკავშირის წევრი ქვეყანა.

- თქვენი აზრით, "მიზანი ამართლებს საშუალებას"?

ირაკლი ალასანია:

- ამ თეზისით ბოლშევიკურ-კომუნისტური ლიდერები ადამიანების დახვრეტას ამართლებდნენ. ამავე თეზისით სარგებლობს ახლა სააკაშვილის, მერაბიშვილისა და ადეიშვილის "ტროიკა". ჩვენი გუნდისთვის ადამიანების ღირსებისა და თავისუფლების შელახვა არანაირი მიზნისთვის არ არის გამართლებული.

გიორგი ბარამიძე:

- ჩემი აზრით, მიზნის მისაღწევად (რაც უნდა დიადი იყოს ის) ნებისმიერი საშუალების გამოყენება არ შეიძლება.

- პოლიტიკაში გადადგმული თქვენი ნაბიჯებიდან არაფერს ნანობთ?

ირაკლი ალასანია:

- ადამიანს იმიტომ აქვს ტვინი და ანალიზის უნარი, რომ საკუთარი ქმედებები გააანალიზოს და განსაზღვროს, სად რა შეცდომა დაუშვა. ჩემს წარსულს მეც კრიტიკული თვალით ვუყურებ, თვითტკბობას არ მივცემივარ. რა თქმა უნდა, ვაღიარებ, რომ ბევრი რამის გაკეთება იმაზე უკეთ შეიძლებოდა, ვიდრე გავაკეთე.

გიორგი ბარამიძე:

- ერთ ნაბიჯსაც არ ვნანობ. პოლიტიკაში ზურაბ ჟვანიამ მომიყვანა. ის ჩემი მეგობარიც იყო და ლიდერიც, ღმერთმა გაანათლოს მისი სული! მის მიერ გადადგმული ნაბიჯები მორალს არასდროს ეწინააღმდეგებოდა. მე დღემდე იმ ჯგუფში ვარ, რომელშიც ზურამ დამტოვა და ზუსტად იმ მიზნებს ვემსახურები, რომლებიც ერთად დავისახეთ.

- ოჯახის წევრებს რამდენად შეუძლიათ თქვენს პოლიტიკურ გადაწყვეტილებებზე გავლენის მოხდენა?

ირაკლი ალასანია:

- ჩემი ვაჟიშვილი 20 წლის ხდება, ქალიშვილი - 16-ის. ბავშვები ჩემს პოლიტიკურ კამპანიას სრულიად ემიჯნებიან, რითაც ძალიან კმაყოფილი ვარ. ვფიქრობ, რომ ჩემი შვილების დამოუკიდებელ ადამიანებად ჩამოყალიბებისთვის ეს ძალზე მნიშვნელოვანია. რაც შეეხება ჩემს მეუღლეს: უკვე 21 წელია, ერთად ვართ და ბუნებრივია, რომ მე მას ყველაზე ახლო მეგობრად მივიჩნევ. მისი პროფესიიდან გამომდინარე (ფსიქოლოგია), ძალიან სასარგებლო რჩევებს მაძლევს. თუმცა ჩემს პოლიტიკურ გადაწყვეტილებებში არ ერევა და არც მომავალში აპირებს.

გიორგი ბარამიძე:

- ვცდილობ, მეტ-ნაკლებად მაინც გავიზიარო ჩემი ახლობლების შეხედულებები და აზრები. ვფიქრობ, რომ ჩემს ქალიშვილს მოვლენების ობიექტურად შეფასებისა და ანალიზის უნარი აქვს. ამიტომ მისი აზრი ჩემთვის საყურადღებო და მნიშვნელოვანია. სხვათა შორის, ჩემი ახლობლების აზრები ჩემს მოსაზრებებს პრაქტიკულად არ ეწინააღმდეგება.

- უნდა გთხოვოთ, თქვენი ოპონენტი დაახასიათოთ.

ირაკლი ალასანია:

- გია ბარამიძეს დიდი ხანია ვიცნობ და ვიცი, რომ ბევრი კარგი თვისება აქვს. პატრიოტი კაცია, სამშობლო ძალიან უყვარს. მასთან კარგი ურთიერთობა მაქვს, ერთმანეთს კარგ "გამარჯობას" ვეუბნებით. ვფიქრობ, შეგვიძლია, ერთმანეთს შეცდომებზე მივუთითოთ. იმედი მაქვს, რომ არჩევნების შემდეგ პარლამენტში შევხვდებით ერთმანეთს ("ნაციონალური მოძრაობა" ალბათ უმცირესობით იქნება წარმოდგენილი) და გარკვეულ შეთანხმებებსაც მივაღწევთ.

გიორგი ბარამიძე:

- ირაკლის პატივს ვცემ. კარგი ადამიანია, სამშობლო უყვარს, მაგრამ ვერ გამიგია, რა უნდა იმ ადამიანის გვერდით, რომელიც საქართველოს ჰააგის სასამართლოში უჩივის (შალვა ხაჭაპურიძეს ვგულისხმობ), ან იმათ გვერდით, პუტინს რომ თავი დაუხარეს. სამწუხაროდ, ის დღეს დგას ბიძინა ივანიშვილის გვერდით, რომელიც პუტინს არ აკრიტიკებს, საკუთარ პრეზიდენტს კი ძაღლისშვილს თუ მამაძაღლს ეძახის. ამ კაცმა საკუთარი ქვეყანა ომის დაწყებაში დაადანაშაულა. მართლაც ასე რომ ყოფილიყო, საკუთარი სამშობლო როგორ უნდა დაედანაშაულებინა?! ირაკლიზე ცუდს ვერაფერს ვიტყვი, მაგრამ ამ ადამიანებთან ურთიერთობას მის ნაკლად მივიჩნევ.

ხათუნა ბახტურიძე

ჟურნალი ”გზა”

(გამოდის ხუთშაბათობით)