"რუსთავი 2" კიდევ ორმა იუმორისტმა დატოვა

"რუსთავი 2"-დან ბერას სტუდიაში იუმორისტების გადაბარგება გრძელდება. ამჯერად "თქვენი შოუ" იუმორისტებმა ირაკლი დიდებულიძემ და კაკი ჭანკურიძემ დატოვეს და ტელევიზია "ჯი-დი-ეს"-ს შეუერთდნენ, რომელიც, როგორც თავად ამბობენ, მალე დაიკავებს საპატიო ადგილს ქართულ ტელესივრცეში. ჩვენ ბიჭებს "რუსთავი 2"-ის დატოვების მიზეზებზე და მომავალ გეგმებზე სასაუბროდ ფაქოსთან, იმავე ლევან გოგორელიანთან ერთად შევხვდით.

- რატომ წამოხვედით "რუსთავი 2"-დან?

ირაკლი:

- სამი თვეა, რაც ეს ტელევიზია დავტოვე. მიზეზი ძალიან მარტივია. "რუსთავი 2"-ში გაჩნდა "ვირული ხელშეკრულება", რომელზეც ხელი უნდა მომეწერა. ხელშეკრულების პირობები არ მომეწონა. შესაბამისად, არც ხელი მოვაწერე. ჰოდა, ავდექი და წამოვედი.

- "ვირული ხელშეკრულება" რას ნიშნავს?

- თქვენ გყოლიათ ვირი?

- არა.

- რომ გყოლოდათ, რა ტიპის ხელშეკრულებას გაუფორმებდით? ალბათ ჩაწერდით, რომ უნდა გემსახუროთ, წაიღოს ტვირთი, მოიტანოს, მაგრამ ამ კონტრაქტში სადმე ნახსენები იქნებოდა ხელფასი, რომელსაც ვირს გადაუხდიდით?

- ხელფასს ალბათ არ გადავუხდიდი, მაგრამ ვაჭმევდი, რომ არ წაქცეულიყო.

- ვირი თავისით ჭამს, ეს დაიმახსოვრეთ (იცინის)! მოკლედ, უარი ვთქვით ვირობაზე.

- ეს ხელშეკრულება მანამდე სხვაგვარი იყო?

- არა, აქამდე უბრალოდ არ არსებობდა, ყოველ შემთხვევაში ჩემთვის. არალეგალი ვიყავი, ჰონორარზე ვმუშაობდი.

- თუ არ ვცდები, მაგ კონტრაქტზე საუბრობდა დავით გოგიშვილი ჩემთან ინტერვიუში, ამბობდა, რომ "რუსთავი 2" თანამშრომლებს ტელევიზიის დატოვების შემთხვევაში 50 ათასი ლარით აჯარიმებს.

ფაქო:

- ეგ მანამ, სანამ მე და ამიკო წამოვიდოდით, მერე ეგ თანხა მგონი გაიზარდა.

ირაკლი:

- არ ვიცი, კონკრეტულად ჯარიმის თანხებზე საუბრის უფლება მაქვს თუ არა. თანამშრომლების შენარჩუნების გარკვეული პირობები გათვალისწინებული იყო კონტრაქტში, მაგრამ მითითებული იყო ვადები. სხვადასხვა შემთხვევაში სხვადასხვა იყო ჯარიმის თანხის ოდენობა.

- კაკი, შენც იმავე მიზეზით წამოხვედი?

- არა, მე მოწერილი მქონდა ხელი ხელშეკრულებაზე, ოღონდ მანამდე, სხვა კონტრაქტზე. მე სხვა გრაფიკით ვმუშაობდი. შტატში ვიყავი. ყოველდღე მიწევდა მუშაობა კვირის გარდა. სცენარისტიც ვიყავი და მსახიობიც. ჩემს შემთხვევაში უფრო შემოქმედებითმა ფაქტორმა განაპირობა ამ გადაწყვეტილების მიღება. სიახლე მინდოდა, განვითარება. ადრე თსუ-ს მხიარულთა და საზრიანთა გუნდში ვთამაშობდი, მერე ტელევიზიაში მოვედი, მონაწილეობა მივიღე "სხვა კონცერტში", ვმუშაობდი "თქვენ შოუში". ერთ დღესაც მივხვდი, რომ წინ ვეღარ მივდიოდი. ვფიქრობ, რომ აქ განვითარების ყველაზე მაგარი საშუალებაა.

- კი მაგრამ, ეს კარი ყველასთვის ღია ხომ არ არის. მოლაპარაკებები თავიდანვე მიმდინარეობდა? ბერას სტუდიაში გადმობარგებულ იუმორისტებს ხშირად ანგარებაში სდებენ ბრალს...

კაკი:

- მე შემომთავაზეს მანამ, სანამ "რუსთავი 2"-ს დავტოვებდი. თუმცა, სამი დღეა ამ ჯგუფში გადმოვედი და ჯერ ანაზღაურების პირობებზე არც გვისაუბრია. ჩემი დაინტერესება ფინანსებს მართლა არ უკავშირდება. კიდევ ერთხელ ვიმეორებ, ჩემთვის მთავარია შემოქმედებითი ზრდა. "რუსთავი 2"-ში ორი წელიწადი ვმუშაობდი. ეს შეიძლება მცირე დროა, ბიჭებს ექვსი წელი აქვთ იქ ნამუშევარი, მაგრამ ამ ორი წლის განმავლობაში ენთუზიაზმით მივდიოდი ტელევიზიაში. ჩემი, როგორც სცენარისტის და მსახიობის მუშაობა იქ ისე არ ფასდებოდა, როგორც უნდა დაფასდეს ნორმალურ ქვეყანაში და ნორმალურ გარემოში.

ფაქო:

- იყო შემთხვევა, როცა მე კაკის დავურეკე და ვკითხე, შეიძლება შენთან საქმიან წინადადებაზე ლაპარაკი-მეთქი. მან უარი მითხრა. ეს ჩემთვის აბსოლუტურად გასაგები იყო. მოგვიანებით ჩვენი საუბარი და შემდეგ თანამშრომლობაც შედგა. უბრალოდ, გული მწყდება, რომ შეიძლებოდა დღეს ბევრი ჩვენი ყოფილი თანაგუნდელი ჩემ გვერდით იდგეს და არ დგას. ყველაზე არ ვლაპარაკობ, რა თქმა უნდა. კაკი მათ შორის იყო, ვინც გვინდოდა ჩვენს გუნდში ყოფილიყო. ირაკლის შემთხვევაში საქმე სხვაგვარად იყო. მივიღეთ და მან შემდეგ საქმით დაამტკიცა, რომ ჩვენს გუნდში ყოფნას იმსახურებდა. გარკვეული პასუხისმგებლობა მეკისრება, როცა თანამშრომლებს ვარჩევ. ზუსტად იმიტომ, ვიღაცებმა არ ჩათვალონ, რომ მე "რუსთავი 2"-ს ვშლი (იცინის) და ყველას ვთავაზობ სამსახურს, ვინც იქ მუშაობდა ან მუშაობს.

- მე ვიცი, რომ მოლაპარაკებები გქონდათ ნიკა გრიგოლიასთანაც, ზუსტად იმ პერიოდში, როცა ვანო ჯავახიშვილმა ჩემთან ინტერვიუში დაადასტურა, რომ ნიკა პირადი პრობლემებისა და უდისციპლინობის გამო "კომედი შოუდან" გაათავისუფლეს...

- მე ნიკა გრიგოლიასთან მოლაპარაკება არ მიწარმოებია. სხვანაირად იყო ეგ ყველაფერი. დრო მოვა და ყველა ყველაფერს გაიგებს. უმჯობესია თვითონ ნიკას ჰკითხოთ.

ირაკლი:

- ერთ მაგალითს გეტყვით, იმ პერიოდში, როცა "რუსთავი 2"-ში ვმუშაობდი, სხვა სამსახურიც მქონდა. იქ არ მომწონდა დირექტორების მმართველობა და ბევრი სხვა რამ. ერთ-ერთი იუმორისტული ნომერი მათ მივუძღვენი, რის გამოც იმ სამსახურიდან გამათავისუფლეს. მოგვიანებით კონტრაქტის პირობების გამო "რუსთავი 2"-იც დავტოვე და დავრჩი უმუშევარი. არადა, ერთადერთი დასაქმებული ვიყავი ოჯახში. ისე მივატოვე სამსახური, დასაქმების პერსპექტივა არ მქონია. სამი თვე უმუშევარი ვიყავი. იმის თქმა მინდა, რომ "რუსთავი 2"-დან ბერას სტუდიაში გადაბარგების მიზნით არ წამოვსულვარ.

ფაქო:

- მე სულ არ მეთაკილება, ფინანსურად დაინტერესება რომ არსებობდეს ხელოვან ადამიანებში. "იმედზე" რომ გადავსულიყავი, ხომ არ იტყოდნენ იმას, რასაც ახლა ამბობენ ჩვენზე. არადა, ეს ტელევიზია ბევრად მეტ ფულს მთავაზობდა, ვიდრე "რუსთავი 2" მიხდიდა.

- გადასვლის შემთხვევაში, თუ იმ პროდუქციაზე, რასაც შემდეგ შექმნიდი?

- გადასვლაც უკვე დიდ თანხად იყო შეფასებული. შექმნილ პროდუქციაზე გადახდილი ანაზღაურება სხვა იქნებოდა. ამიტომ ყველას ვურჩევ, მოერიდონ ჩვენთვის იარლიყების მოწებებას. ჩვენს გადაწყვეტილებაში მთავარი დაინტერესება არის კრეატივი. აქ დიდი მნიშვნელობა ენიჭება პროდუქციის გემოვნებით შეფუთვასაც კი, რაც "რუსთავი 2"-ში ფუჩეჩად ითვლებოდა.

- უკვე რამდენიმე თვეა გვე­სმის ეს სიტყვა - კრეატივი, მაგრამ ჯერ ვერ ვნახეთ შედეგი.

- შედეგს ნახავთ მაშინ, როცა ტელევიზია ეთერში გავა. ჩვენ ვმუშაობთ. უკვე ცხრა, ერთმანეთისგან ჟანრობრივად განსხვავებული იუმორისტული პროექტი გვაქვს მზად. არის ღამის ეთერისთვის განკუთვნილი პროექტი, პროექტი, რომელიც კვირაში ერთხელ 5 წუთით გავა ეთერში და თავისი ხიბლი ექნება. დღეს კიდევ ერთი პროექტის იდეა გაჩნდა, რომელიც ნაკლებად იუმორისტულია, მაგრამ ცხოვრებისეულია და ვფიქრობ, ყველაზე საინტერესო იქნება ქართველი მაყურებლისთვის.

- რამდენიმე თვის წინ "თქვენ შოუს" ხელმძღვანელობა შეეცვალა. ალეკო მალხაზიშვილის გუნდს გამოეყო გიორგი აფციაურის გუნდი და აბსოლუტურად სხვა გარემოში, სხვა წამყვანებით განახლდა გადაცემა. განხეთქილების მიზეზებზე არც ერთი მხარე არ საუბრობს. რა მოხდა რეალურად, შეგიძლიათ გვითხრა?

ფაქო:

- ალეკო მალხაზიშვილი ამ გადაცემის ხელმძღვანელი არც არასდროს ყოფილა. შეიძლება იბრალებდა, მაგრამ არ ყოფილა. "თქვენი შოუს" იდეის ავტორი იყო გიორგი აფციაური თავის გუნდთან ერთად. ალბათ ამიტომაც მოხდა ეგ განხეთქილება, რომ ვიღაცები ცუდად ჩაერივნენ გადაცემის საშინაო საქმეებში.

- ფაქო, რას გააკეთებენ ირაკლი და კაკი თქვენს გუნდში?

- სერიალ "ცუდი ბიჭების" სცენარისტები არიან, რომლის გადაღებაც უკვე დაწყებულია.

- კიდევ ვინმე ხომ არ გადმოდის "რუსთავი 2"-დან თქვენთან?

- ზეგ კიდევ ორი ადამიანი დატოვებს "რუსთავი 2"-ს და ჩვენთან გადმოვა. და "ეტა ნი ვსიო" (იცინის).

- ამბობ, რომ "რუსთავი 2"-ს არ შლი და სინამდვილეში ამის სურვილი გაქვს...

- ჩვენს გადაწყვეტილებებს არავითარი პოლიტიკური დატვირთვა არ აქვს, თუმცა თითოეულ ჩვენგანს საკუთარი პოლიტიკა გვაქვს "რუსთავი 2"-თან.

- ანუ, მუშაობთ იმ ტელევიზიიდან ხალხის გადმობირებაზე?

- გადმობირებაზე არა. ჩვენ არავის ვუჯდებით და არ ვუხსნით, რა ცუდია "რუსთავი 2"-ში და რა კარგია ჩვენთან. ეს არ გვჭირდება. ყველამ იცის, სად როგორი პირობებია. ვიცი, ბოღმიანს დამიძახებენ, მაგრამ არ არის ეგრე. მჭირდება ეს ხალხი და რა ვქნა? არავის არაფერს ვაძალებ, მათივე სურვილის შემთხვევაში გადმომყავს.

- გოგონები თუ გყავთ გუნდში?

- ჯერ არა.

- სერიალს ხომ დასჭირდება მდედრობითი სქესი, თან თემო მჟავია კატეგორიულ უარზეა, მე კაბას აღარ ჩავიცვამო.

ფაქო:

- (იცინიან) მსახიობი გოგონები გვყავს. სცენარისტი გოგო გვინდა. ქალი სხვანაირად წერს "სვეცკი" გოგოების დიალოგებს, მათთან დაკავშირებულ სცენარებს. ვნახოთ, გამოჩნდებიან.

- ვინ ხელმძღვანელობს თქვენს გუნდს?

- ყველა ერთად. ჩვენთან ხელმძღვანელი თანამდებობები არ "მოსულა". ყველა ერთად ვსხდებით და ვიღებთ გადაწყვეტილებას. შეიძლება ბოლო ნაბიჯი მე გადავდგა, მაგალითად, დიდ თათბირზე ხელმძღვანელობასთან ავიდე და ვილაპარაკო ჩემი გუნდის ენით, მაგრამ გადაწყვეტილებებს ერთად ვიღებთ. ყველაზე მთავარი, რაც "რუსთავი 2"-ში ვისწავლე, არის ის, რომ არასდროს უნდა მოვექცე თანამშრომლებს ისე, როგორც მე მექცეოდნენ იქ. არასდროს არ უნდა გავხდე მათნაირი.

- როგორ გექცეოდნენ?

- ეგ ცალკე თემაა, ადრე თუ გვიან მაგასაც ვიტყვი.

ნინო მჭედლიშვილი

ჟურნალი "რეიტინგი"

(გამოდის ორშაბათობით)