ავსტრიის მთელს ტერიტორიაზე სრული "ლოქდაუნი“ ამოქმედდა - რისი უფლება აქვთ მოქალაქეებს
ავსტრიის მთელს ტერიტორიაზე დღეიდან სრული „ლოქდაუნი“ ამოქმედდა.
შეზღუდვების ფარგლებში, მოქალაქეებს შინ დარჩენა ევალებათ, გამონაკლისი შეეხება მხოლოდ მათ, ვინც სახლიდან სამსახურში, საკვების საყიდლად ან სავარჯიშოდ წასასვლელად გავა.
ქვეყანაში დაიხურა რესტორნები, ბარები, სალონები და მაღაზიები, სადაც აუცილებელი საჭიროების პროდუქცია არ იყიდება.
შეზღუდვები 12 დეკემბრამდე გაგრძელდება, თუმცა, ხელისუფლება აცხადებს, რომ სიტუაციის შეფასება 10 დღის შემდეგ მოხდება.
ჯანდაცვის მსოფლიო ორგანიზაციამ ევროპის რეგიონში კორონავირუსის შემთხვევების ზრდის გამო შეშფოთება გამოხატა. ჯანმო-ს ევროპის რეგიონული დირექტორის დოქტორ ჰანს კლუგეს განცხადებით, თუ ზომები არ გამკაცრდება, მომდევნო გაზაფხულზე შესაძლოა, კიდევ ნახევარი მილიონი ადამიანი გარდაიცვალოს.