"მე ღმერთს ყველაფერს მოვუყვები“ - 12 წლის იორდანიელი ბიჭის სულისშემძვრელი მიმართვა გარდაცვალებამდე რამდენიმე დღით ადრე
12 წლის ბიჭის ამირ მოჰამედ ჰასან ალ რიფაის გარდაცვალებას იორდანიაში საზოგადოების აღშფოთება მოჰყვა. ბიჭი კისტოზური ფიბროზით გარდაიცვალა. გარდაცვალებამდე რამდენიმე დღით ადრე კი ვიდეო გაავრცელა, სადაც ის ხელისუფლებას დახმარების თხოვნით მიმართავდა, რათა საზღვარგარეთ სამკურნალოდ გაეგზავნათ.
ამირი პრინცესა რაჰმას ბავშვთა საავადმყოფოში გარდაიცვალა.
- "მომბეზრდა და დავიღალე იმით, რომ არავის სურს ჩემი დახმარება იმიტომ, რომ მამაჩემი ღარიბია და არაფრის გაკეთება არ შეუძლია ჩემთვის. მაგრამ მე ღმერთს ყველაფერს მოვუყვები“, - ამბობდა ამირი თავის ბოლო შეტყობინებაში.
მანამდე კიდევ ერთი ვიდეო გავრცელდა, სადაც ბიჭის მამა სთხოვდა იორდანიის ხელისუფლებას დახმარებას, რათა მოზარდი საზღვარგარეთ გაეგზავნათ სამკურნალოდ.
"ამირამდე უკვე სამი ვაჟი დავკარგე, ყველა მათგანი იგივე დაავადებით გარდაიცვალა. 10 წელზე მეტია ჩინოვნიკებს მივმართავ, მაგრამ უშედეგოდ“, - ამბობს გარდაცვლილის მამა.
- ამირის უკანასკნელი ვიდეო სოციალურ ქსელში ვირუსულად გავრცელდა. სოციალური ქსელების მომხმარებლები და მედია მთავრობას დაუდევრობაში ადანაშაულებენ და სოციალურ სამართლიანობას მოითხოვენ. ამბობენ, რომ მკურნალობის შესაძლებლობა ყველას უნდა ჰქონდეს.
ბიჭუნა ოთხშაბათს დაკრძალეს და მის დაკრძალვას ათასობით მოქალაქე დაესწრო.
ცნობისთვის, კისტოზური ფიბროზი გენეტიკური დაავადებაა, რომელიც იწვევს ფილტვების, საჭმლის მომნელებელი სისტემის და სხვა ორგანოების მძიმე დაზიანებას. ის გავლენას ახდენს უჯრედებზე, რომლებიც გამოიმუშავებენ ლორწოს, ოფლს, საჭმლის მომნელებელ წვენს.