მოციმციმე არითმიითა და დიაბეტით დაავადებული 72 წლის პაციენტი ბოკერიას ჰოსპიტალში ერთთვიანი მკურნალობის შემდეგ კოვიდ 19-სგან განიკურნა
„ნინო ექიმმა 2–ჯერ მომაბრუნა ამ ქვეყანაზე,“ – ეს 72 წლის დურსუნ მენთეშაშვილია, რომელიც ივ. ბოკერიას სახელობის საუნივერსიტეტო ჰოსპიტლიდან თითქმის ერთთვიანი მკურნალობის შემდეგ სახლში გაეწერა.
დურსუნ მენთეშაშვილს კოვიდ 19 მეუღლისგან გადაედო, თუმცა ჰოსპიტალიზაცია მხოლოდ მას დასჭირდა, ვინაიდან თანმხლები დაავადებები აწუხებდა. პაციენტს გულის შუნტირება ჰქონდა გაკეთებული და, მოციმციმე არითმიასთან ერთად, გულის უკმარისობა და დიაბეტი აღენიშნებოდა. საყურადღებო გახლდათ ის ფაქტიც, რომ პაციენტი არ იყო ვაქცინირებული.
„დადასტურებული კოვიდ პასუხიდან რამდენიმე დღეში სხვადასხვა სიმპტომი დამემატა. მქონდა მაღალი ტემპერატურაც, ამიტომ ივ. ბოკერიას სახელობის საუნივერსიტეტო ჰოსპიტალში გადამიყვანეს. გახსენებაც არ მინდა, რა გამოვიარე. ნინო ექიმი ჩემი ფსიქოლოგიც იყო. ეს ვირუსი ისეთი ვერაგია, ყველა ორგანოს ედება და ფსიქოლოგიურად აზიანებს ადამიანს. თუ ფსიქიკურად კარგად არ ვგრძნობ თავს, მაშინ ყველაფერი პირიქით გეჩვენება და სიცოცხლისკენ შემობრუნებაც რთულია. ვცდილობდი, ექიმისთვის დამეჯერებინა. ვიყოჩაღე და ცოცხალიც გადავრჩი,“ – გვიყვება დურსუნ მენთეშაშვილი.
მისი მკურნალი ექიმი, ნინო ქუხილავა ივ. ბოკერიას სახელობის საუნივერსიტეტო ჰოსპიტალში კოვიდ-თერაპიული განყოფილების ხელმძღვანელია. მას ყოველდღიურად ათობით ინფიცირებული პაციენტის სიცოცხლისთვის უწევს ბრძოლა, თუმცა დურსუნ მენთეშაშვილი განსაკუთრებით საყურადღებო პაციენტი იყო მისი არაერთი თანმდევი დაავადების გამო. ფონს ისიც ამწვავებდა, რომ პაციენტი არ იყო ვაქცინირებული. როგორც ნინო ქუხილავა აღნიშნავს, პაციენტმა თავადაც ბევრი იბრძოლა და ვერაგი ვირუსის დამარცხება შეძლო.
დურსუნ მენთეშაშვილი უკვე სახლშია. საკუთარ კარდიოლოგთან კონსულტაციის შემდეგ, ის გულის პრობლემების მკურნალობასაც განაგრძობს. მას ჟანგბადი აღარ სჭირდება, აქტიურია და ცხოვრებას ჩვეულ რეჟიმში განაგრძობს.