"დაბაში ასაცრელად ჩამოვიდა. სიცხე მქონდა და ტესტმა კორონავირუსი აჩვენაო" - ხულოში კოვიდით 37 წლის სოფლის რწმუნებული გარდაიცვალა
ხულოს მუნიციპალიტეტის სოფელ კორტოხში კორონავირუსით 37 წლის მამაკაცი გარდაიცვალა. გარდაცვლილი ამავე სოფლის რწმუნებული ზვიად პაქსაძეა. ინფორმაციას "ბათუმელები" ავრცელებს.
როგორც სააგენტოს დიოკნისის ადმინისტრაციულ ერთეულში მერის წარმომადგენელმა, გურამ კახაძემ განუცხადა, მის კოლეგას კორონავირუსი დაახლოებით ხუთი დღის წინ დაუდასტურდა.
"დაბაში ასაცრელად ჩამოვიდა. სიცხე მქონდა და ტესტმა კორონავირუსი აჩვენაო - ასე მითხრა, როცა დაურეკე", - აცხადებს "ბათუმელებთნ" საუბარში გურამ კახაძე. მისივე ინფორმაციით, ზვიად პაქსაძე ოთხი დღის წინ ბათუმის ერთ-ერთ კლინიკაში გადაიყვანეს.
ის წუხელ, გვიან ღამით გარდაიცვალა.
გურამ კახაძის თქმით, ზუსტად არ იცის სოფელ კორტოხში არიან თუ არა ადამიანები თვითიზოლაციაში. ამ სოფელში სხვა ინფიცირებულების შესახებ მას ინფორმაცია არ აქვს. ასევე აქვს ინფორმაცია, რომ გარდაცვლილის ოჯახის წევრებს - მეუღლეს და შვილებს ტესტით ვირუსი არ დაუდასტურდათ.
ცნობისთვის, გასული დღე-ღამის განმავლობაში, მხოლოდ აჭარაში კორონავირუსით 12 ადამიანი გარდაიცვალა. ქვეყნის მასშტაბით - 59.