"ორ სატვირთო მანქანას გავატარებთ და ისევ გადაიკეტება გზა" - ვარლამ გოლეთიანი რიონის ხეობაში განვითარებულ მოვლენებზე

ორ სატვირთო მანქანას გავატარებთ და შემდგომ ჩვეულებრივად გადაიკეტება გზა - მადლობა ღმერთს, რომ დღეს არ მოხდა შეტაკება სამართალდამცველებსა და პროტესტის მონაწილეებს შორის, - ამის შესახებ რიონის ხეობაში, სადაც „ნამახვანჰესის“ მშენებლობის მოწინააღმდეგეების აქცია მიმდინარეობს, ვარლამ გოლეთიანმა განაცხადა.

მისივე თქმით, ისინი ადგილზე მთელი ღამის განმავლობაში დარჩებიან.

ის მოუწოდებს ხელისუფლებას, რომ ნუ შეიყვანს პროცესს ჩიხურ მდგომარეობაში.

“ორ სატვირთო მანქანას, რომელიც დატვირთულია, გავატარებთ. აქ ჩვენ მთელი ღამე უნდა გავატაროთ, აქ არიან ქალები, ბავშვები, ამიტომ რომ არ მოხდეს რამე ინციდენტი შემთხვევით, ამ ორ მანქანას გავატარებთ და ისევ გადაიკეტება გზა. რადგან ამ მანქანებზე ქვები აწყვია უსაფრთხოების მიზნით, რომ მერე რაღაც არ მოხდეს და სპეკულაციები ხდება ყოველთვის ამასთან დაკავშირებით ან არ გადმოვარდეს რამე, ამ ორ მანქანას გავატარებთ. ეს არ არის “ენკას” მანქანები ეს არის კარიერიდან წამოღებული ქვები, ანუ სხვა კომპანიაა, რომელიც გრანიტის მოპოვებას ახორციელებს ხეობაში”, - განაცხადა გოლეთიანმა.

მანამდე პოლიციამ აქციის მონაწილეებს მოუწოდა გზა გაეხსნათ და ავტომობილები გაეტარებინათ.

შეგახსენებთ, შსს-მ განცხადება გაავრცელა, რომლის თანახმადაც, სოფელ ნამახვანის მიმდებარედ, რიონის წყლის დონე სასიგნალო ნიშნულს აღემატება, რის გამოც მიიღეს გადაწყვეტილება, ზონიდან კარვების გატანისა და მოქალაქეების უსაფრთხო ადგილას გადაყვანის შესახებ.

იმერეთის სამხარეო პოლიციის უფროსის სულხან თამაზაშვილის განცხადებით, კარვების აღება მეტნაკლებად მშვიდობიან ვითარებაში მოხდა. სოფელ ნამახვანთან აქციის ორგანიზატორებს შესთავაზეს, რომ კარვებს პოლიცია სოფელ გუმათთან ჩაიტანს.

ამასთან, სოფელ ნამახვანთან, რიონის ხეობაში განვთარებულ მოვლენებთან დაკავშირებით სახალხო დამცველი განცხადებას ავრცელებს.

სახალხო დამცველის განცხადებაში ნათქვამია, რომ კარვების დაშლის თაობაზე მიღებული გადაწყვეტილების კანონიერებას სახალხო დამცველი დამატებით შეისწავლის.

განცხადებაში აღნიშნულია, რომ დაუყოვნებლივ მიეცეთ აქციის მონაწილეებს მათ მიერ შეთავაზებულ ალტერნატიულ ადგილზე შეკრების გაგრძელების შესაძლებლობა.

“სახალხო დამცველი აქტიურად აკვირდება რიონის ხეობაში დღეს განვითარებულ მოვლენებს. სახალხო დამცველის წარმომადგენელი ამ დრომდე ხეობაშია, მათ შორის იმ ადგილზეც იმყოფებოდა, სადაც პოლიციამ აქციის მონაწილეთა კარვები დაშალა და უშუალო კომუნიკაცია ჰქონდა მხარეებთან. კარვების დაშლის თაობაზე მიღებული გადაწყვეტილების კანონიერებას სახალხო დამცველი დამატებით შეისწავლის.

ქუთაისიდან ნამოხვანის მიმართულებით გზა ერთი მხრიდან უკვე რამდენიმე დღეა გადაკეტილი აქვს პოლიციას, ხოლო მეორე მხრიდან, კარვების აღების შემდეგ, პროტესტის მიზნით გადაკეტეს აქციის მონაწილეებმა, რომლებიც ითხოვენ ნამოხვანში შეკრების გაგრძელების შესაძლებლობის მიცემას.

კონსტიტუციით გარანტირებული უფლებებიდან გამომდინარე, შეკრების თავისუფლებაში დაუსაბუთებელი ჩარევის თავიდან აცილების მიზნით, სახალხო დამცველი მოუწოდებს შინაგან საქმეთა სამინისტროს:

დაუყოვნებლივ მიეცეთ აქციის მონაწილეებს მათ მიერ შეთავაზებულ ალტერნატიულ ადგილზე შეკრების გაგრძელების შესაძლებლობა, ხოლო თუ აღნიშნულზე არსებობს დასაბუთებული უარის საფუძველი, აქციის გაგრძელებისთვის გამოეყოთ ალტერნატიული ადგილი სასურველთან ახლომდებარე ლოკაციაზე, რომლის ადგილმდებარეობაც არსს არ დაუკარგავს მოქალაქეთა თავშეყრის მიზანს

საზოგადოებას მიაწოდოს დეტალური ინფორმაცია სოფელ ნამოხვანთან მისასვლელი გზების გადაკეტვის მიზეზებისა და ხანგრძლივობის შესახებ

სახალხო დამცველის აპარატი აგრძელებს ბოლო პერიოდში და დღეს რიონის ხეობაში მიმდინარე მოვლენების და შესაძლო უფლებადარღვევების დეტალურ შესწავლას, რომლის შედეგებსაც დამატებით აცნობებს მოსახლეობას”, - ნათქვამია განცხადებაში.