"გახარია ბიძინა ივანიშვილის პროექტია... ვფიქრობ, ის "ოცნებას" წაართმევს ამომჩეველს" - დეკანოიძე

"ნაციონალური მოძრაობის" ერთ-ერთ ლიდერი ხატია დეკანოიძე მიიჩნევს, რომ გიორგი გახარია ბიძინა ივანიშვილის პროექტია.

ამის შესახებ მან "ტვ პირველის" ეთერში განაცხადა, სადაც IRI-ის კვლევის შედეგებს გამოეხმაურა, რომლის თანახმად გამოკითხულთა უმრავლესობას, პოლიტიკოსებიდან, ყველაზე მეტად გიორგი გახარია მოსწონთ.

მისივე ვარაუდით, გახარია პოლიტიკაში დაბრუნების შემთხვევაში ამომრჩეველს "ქართულ ოცნებას" წაართმევს.

"გახარიასთან დაკავშირებით რაც შემიძლია გითხრათ, პირველი ის არის, რომ მე ცოტა განსხვავებული მოსაზრება მაქვს მასთან დაკავშირებით - გახარია ბიძინა ივანიშვილის პროექტია თავიდან ბოლომდე, იმიტომ, რომ გახარიას წასვლამ "ოცნება" ძალიან დააზიანა.

შესაძლებელია ივანიშვილი განიხილავდეს თავისი "პროქსების" ანუ დანამატების შექმნას, რომ რაღაცნაირად შემდეგ დაჯგუფდნენ, რადგან ვნახეთ როგორია "ოცნების" მხარდაჭერა, 35%-ია. დანარჩენი 34% არის გადაუწყვეტელი ამომრჩეველი.

ამიტომ შესაძლებელია ივანიშვილი განიხილავდეს მის (გახარიას) "პროქსად" წარმოჩენას. ყოველ შემთხვევაში, ხმები "ოცნებასა" და პროქსებს შორის უფრო გაიყოფა. მერე როგორ დაწყვილდებიან, ეს არ ვიცი.

ვფიქრობ, ის "ოცნებას" წაართმევს იმ ამომჩეველს, ვისაც გახარია მიაჩნდათ ზომიერ ადამიანად.

გახარიას თუ უნდა, რომ ნამდვილ ოპოზიციონერად წარმოჩინდეს, ბევრ კითხვაზე მოუწევს პასუხის გაცემა. მაგალითად, 20 ივნისზე, გახმაურებულ საქმეებზე, ივანიშვილთან დაკავშირებით", - ამბობს დეკანოიძე.