Facebook-მა ვენესუელას პრეზიდენტის, ნიკოლას მადუროს, ოფიციალური გვერდი კორონავირუსთან დაკავშირებული ცრუ ინფორმაციის გავრცელების გამო დაბლოკა.
BBC-ის ინფორმაციით, მადურომ სოციალურ ქსელში დაწერა, რომ კორონავირუსისგან განკურნება სხვადასხვა მცენარის გამოყენებითაც არის შესაძლებელი. გადაუმოწმებელი ან ყალბი ინფორმაციის გავრცელების გამო Facebook-მა მისი ოფიციალური ანგარიში 30 დღით დაბლოკა.
აღსანიშნავია, რომ კორონავირუსთან დაკავშირებით ცრუ ინფორმაციის გავრცელების პრევენციის მიზნით Facebook-მა ბოლო დროს რეგულაციები გაამკაცრა. მსგავსი დეზინფორმაციის გავრცელების გამო ანგარიში დროებით დაებლოკათ აშშ-ის ყოფილ პრეზიდენტ დონალდ ტრამპსა და ბრაზილიის პრეზიდენტ ჟაირ ბოლსონარუსაც.
