"მათ არ აქვთ ამომწურავი ინფორმაცია" - როგორ აფასებენ "ნაციონალურ მოძრაობაში" ბრიუსელში გაკეთებულ განცხადებებს?

ბრიუსელში ასოცირების საბჭოს სხდომის დასრულების შემდეგ, უსაფრთხოების პოლიტიკის საკითხებში ევროკავშირის უმაღლესმა წარმომადგენლმა ჯოზეფ ბორელმა დააანონსა, რომ კრისტიან დანიელსონი მხარეებს უახლოეს დღეებში კონკრეტულ შეთავაზებას გაუკეთებს. ამის პარალელურად, პრემიერმა ირაკლი ღარიბაშვილმა ბრიუსელში ევროტრიბუნიდან კატეგორიულად განაცხადა, რომ საპარლამენტო არჩევნები საქართველოში 2024 წლამდე არ ჩატარდება. არადა, ვადამდელი არჩევნები ის თემაა, რომლის დათმობასაც ოპოზიცია არც ფიქრობს. ასოცირების საბჭოს განცხადებაც დაემატა, მანამდე კი - ეუთო/ოდირის, IRI -ს მიერ გაკეთებულ შეფასებებს იმის თაობაზე, რომ საქართველოში კონკურენტული, სამართლიანი და თავისუფალი არჩევნები ჩატარდა, რასაც "ქართული ოცნება“ საკუთარ გამარჯვებად თვლის.

პარტნიორების განცხადებებზე საკუთარ მოსაზრებებს ambebi.ge-ს "ერთიანი ნაციონალური მოძრაობის“ წევრი რომან გოცირიძე უზიარებს.

- როგორ გესმით ჯოზეფ ბორელის განცხადება იმასთან დაკავშირებით, რომ ბოიკოტი არ არის გამოსავალი და რომ "არჩევნები საქართველოში ეუთომ სამართლიანად და თავისუფლად მიიჩნია“?

- როდესაც ქვეყანაში არის პოლიტიკური კრიზისი და თუ ამ კრიზისის განმუხტვის სხვა საშუალება არ არსებობს, გარდა რიგგარეშე არჩევნებისა, ბუნებრივია, რომ ამ შემთხვევაში მნიშვნელობა აქვს კრიზისიდან გამოსვლის ფორმას და არა იმას, თუ ვინ როგორ აფასებს არჩევნებს. მით უმეტეს, რომ ეუთოს არ უთქვამს, რომ ეს არჩევნები იყო სამართლიანი, დემოკრატიული და თავისუფალი. ეუთომ თქვა, რომ ეს იყო კონკურენტული არჩევნები და ასევე იყო ბორელის განცხადებაშიც.

- ანუ გინდათ თქვათ, რომ განცხადება არასწორად თარგმნეს?

- არა, ტერმინებს დიდი მნიშვნელობა აქვს. კონკურენტული არჩევნები ბელარუსშიც იყო, სადაც მონაწილეობდა ბევრი პარტია და სადაც ჰქონდათ არა იმდენი საშუალება, რაც საქართველოში, მაგალითად, გამოხატვის იმიტომ, რომ იქ არ არის თავისუფალი მედია, აქ კი კრიტიკული ტელევიზიები ბევრი იყო. კონკურენტულობა იმას ნიშნავს, რომ არჩევნებში 66 პარტია მონაწილეობდა და ყველას ჰქონდა საკუთარი აზრის გამოხატვის შესასაძლებლობა ტელეეკრანებიდან, მაგრამ ეს სულაც არ ნიშნავს იმას, რომ არჩევნები არ გაყალბებულა და არჩევნები იყო თავისუფალი. სამართლიანი არჩევნებისთვის ერთი კომპონენტი არ არის მთავარი, თუნდაც ის, რომ ამდენი პარტია მონაწილეობს და რამდენად აქვთ მათ წვდომა საინფორმაციო საშუალებებზე. უმარავი ათასი სხვა კომპონენტია - რა ხდება არჩევნებამდე, როგორ მონაწილეობს ძალოვანი სტრუქტურები, სახელმწიფო აპარატი, ტრიალებს თუ არა არჩევნებში შავი ფული, ხდება თუ არა დაშინება, მოსყიდვა, კრიმინალების გამოყენება და ა.შ. ასე რომ, ის რომ ეუთომ თქვა, რომ არჩევნები კონკურენტულ პირობებში ჩატარდა, ეს სულაც არ ნიშნავს იმას, რომ ეს არჩევნები არ იყო გაყალბებული. ძალიან დიდი მნიშვნელობა აქვს, რა ტერმინებს იყენებენ ხოლმე მსგავს შემთხვევებში.

- ასოცირების საბჭომაც დაასკვნა, რომ 31 ოქტომბრისა და 21 ნოემბრის არჩევნები იყო კონკურენტული და მთლიანობაში, დაცული იყო ფუნდამენტური თავისუფლება. ამის მერე რიგგარეშე არჩევნების მოთხოვნა მაინც რეალურია?

- ზუსტად ეს არის, რომ კონკურენტული და ფუნდამენტური თავისუფლება ჰქონდა პარტიებს, გამოხატვის თავისუფლება მასობრივი ინფორმაციის საშუალებებში, მაგრამ ის, რომ ეს არჩევნები იყო სამართლიანი, თავისუფალი და დემოკრატიული, ამას არ ამბობენ და არჩევნების შეფასებას აქვს თავისი ტერმინები. დიახ, იყო კონკურენტული, მაგრამ განსაკუთრებით პანდემიის პირობებში, ადმინისტრაციული რესურსების პირობებში როდესაც დავალიანებას ჩამოაწერ მოქალაქეებს, რა არის ეს, თუ არა მოსყიდვა? ამიტომ მიუხედავად განსხვავებული შეფასებებისა და ტერმინების გამოყენებებისა, ერთი რამ ფაქტია, რომ მოქალაქეების ნაწილში ეს არჩევნები არ იწვევს სანდოობას და ამ არჩევნების შედეგად შექმნილი ხელისუფლების ნდობა არის მინიმალური. ამის შედეგი ის არის, რომ ქვეყანა იმ ეკონომიკური, ჯანდაცვისა, თუ სოციალური პრობლემების ფონზე არა თუ 4 წელიწადი, ამ ვითარებაში 4 თვეც ვერ გაძლებს. ამიტომაც არ შეწყვეტილა და გრძელდება მოლაპარაკებები, იყო ერთდღიანი პაუზა. როდესაც ევროსაბჭოს პრეზიდენტის წარმომადგენელი თბილისშია, ეს იმას ნიშნავს, რომ პროცესი მიდის და იმედი უნდა ვიქონიოთ, რომ ის მივა საბოლოოდ იმ შედეგამდე, რომელიც პირველ რიგში, აწყობს ქვეყანას და მის მოქალაქეებს.

- მანამდე იყო ეუთო/ოდირის, შემდეგ კი IRI-ს დასკვნა, რომელშიც ვკითხულობთ, რომ "მიუხედავად დისბალანსირებული ოქმების დაფიქსირებისა, მათი მასშტაბი არ ახდენს გავლენას არჩევნების საბოლოო შედეგებზე“. ამ ყველაფრის მიუხედავად, რა არის თქვენი არგუმენტი რიგგარეშე არჩევნებისა?

- ეს დასკვნა იმიტომ შედგა, რომ საქართველოში არ იყვნენ მეთვალყურეები და მათ არ აქვთ ამომწურავი ინფორმაცია. საქართველოში ყველა არასამთავრობო ორგანიზაცია, პარტიები და საზოგადოება ამბობს, რომ იყო ძალიან სერიოზული დარღვევები. ეს ორგანიზაცია, ბუნებრივია, ვერ დაინახავდა როგორ ხდებოდა მოსყიდვები, დაშინება და ა.შ. როგორი შეფასებებიც არ უნდა იყოს, დღეს შექმნილი პოლიტიკური კრიზისიდან, რომელიც ხელისუფლებამ შექმნა, გამოსვლის გზა არის რიგგარეშე არჩევნები. ამ არჩევნებამდე როგორ მივალთ, ეს სხვა საკითხია - მივალთ პირდაპირ დანიშვნით და თარიღი გამოცხადდება, მივალთ პლებისციტით, თუ რაიმე სხვა ფორმით, ეს უკვე არის ტაქტიკა. მიზანი უნდა იყოს ქვეყანაში არსებული მძიმე კრიზისის დაძლევა.

- როგორ ფიქრობთ, მედიაცია წარმატებით დასრულდება?

- მედიაცია წარმატებული იქნება, თუ - წარუმატებელი, ამის თქმა ძალიან ძნელია, მაგრამ მონდომებას რომ არ აკლებს ჩვენი საერთაშორისო მეგობრები, ეს ფაქტია, თორემ დიდი ხანია, შეწყვეტილი იქნებოდა ეს პროცესი.

- ირაკლი ღარიბაშვილმა ასოცირების საბჭოზე გადაჭრით თქვა, რომ მორიგი არჩევნები 2024 წელს ჩატარდება. ამაზე რას იტყვით?

- "ქართული ოცნება“ მანამდეც ამბობდა, რომ არსებობს ე.წ. წითელი ხაზი, რომ რიგგარეშე არჩევნები არ იქნება. შემდეგ მათ თქვეს, მოდით, რიგგარეშე არჩევნებზეც ვიმსჯელოთო და იმ ექვსპუნქტიანი შეთანხმების პროექტში მე-6 პუნქტი არის რიგგარეშე არჩევნები. ანუ მათ არ უთქვამთ, რომ რიგგარეშე არჩევნებზე არ გვექნება მსჯელობაო, შეცვალეს თავიანთი მიდგომა. ღარიბაშვილის ნათქვამი, რომ არჩევნები იქნება 2024-ში, ეს არ არის ის სიტყვები, რასაც მანამდე ამბობდნენ, სანამ შუამავლები ჩაერთვებოდნენ პროცესში და ყურს აუწევდნენ ხელისუფლებას. ეს იმას ნიშნავს, რომ 2024-ში არჩევნები იქნება, ვინაიდან მაგალითად, პლებისციტზე ხალხი არ დაუჭერს მხარს რიგგარეშე არჩევნებს, ან ვინაიდან რა მეთოდიც არ უნდა შევთავაზოთ, რომელიც საბოლოო ჯამში რაღაცაზე იქნება დამოკიდებული - ან თვითმართველობის არჩევნების შედეგებზე, ან პლებისციტზე, ან მადრიდის "რეალისა“ და "ბარსელონას" თამაშის შედეგებზე... ანუ რა კრიტერიუმებიც არ უნდა ჩამოვაყალიბოთ, მათი ტრაბახია, რომ ნებისმიერი კრიტერიუმებით არჩევნები არ იქნება 2024-მდე. ეს სხვა საუბარია, ვიდრე ის, რომ ჩვენ გვაქვს წითელი ხაზები და რიგგარეშე არჩევნების შესახებ არ გვექნება მსჯელობა. ეს ორი გამონათქვამი განსხვავებულია ერთმანეთისგან.

- რიგგარეშე არჩევნებამდე "ნაციონალური მოძრაობის“ მისასვლელი გზა რომელია, თქვენ რას სთავაზობთ ხელისუფლებას?

- დღეს ისე ღრმად წავიდა პროცესი, რომ ყველაზე კარგია, ნუ ვაწვალებთ ქვეყანას. ხომ იცით, პატრონს ძაღლი ძალიან რომ უყვარს და კუდს ნაწილ-ნაწილ რომ აჭრის. თუ მოსაჭრელია, უნდა დაარტყა და მოაჭრა ერთხელ. ამ წვალებას, ჯობია, რომ დაინიშნოს რიგგარეშე არჩევნები, მაგრამ თუ ასე არ მოხდება, ოპოზიციის მხრიდან იყო კომპრომისული შეთავაზება პლებისციტზე და ამაზე უარი ჯერ არავის უთქვამს.

- ხმა გამოვიდა, რომ შეთანხმებას ვერ აღწევთ და ადვილი შესაძლებელია მოლაპარაკებები ჩაიშალოსო, რაც, დამეთანხმებით, ძალიან ცუდი იქნება, უპირველესად ქვეყნისთვის..

- მოლაპარაკება თუ ჩაიშალა და დარჩა ის, რასაც ახლა ვხედავთ - ტელევიზიებით ყველა ერთი და იმავეს ლაპარაკობს და ეკონომიკაზე - არავინ, ასე თუ გაგრძელდა, ამას ქვეყანა დიდხანს ვერ გაუძლებს. მაშინ იქნება მუდმივი, პერმანენტული აქციები, საპროტესტო ტალღა და ა.შ. ნაცვლად იმისა, რომ ამ მძიმე ვითარებაში ქვეყნის მძიმე ეკონომიკური კრიზისიდან გამოსვლაზე ფიქრობდნენ, მუდმივი სახელისუფლებო პოლიტიკური კრიზისი იქნება, რაც ძალიან მძიმედ იმოქმედებს ქვეყნის მომავალზე. პასუხისმგებლობა კი ამ ყველაფერზე ხელისუფლებას ეკისრება. ბატონმა ბორელმა ისიც თქვა, ვინ უნდა გადაჭრას კრიზისი ქვეყანაში - ხელისუფლებას აქვს ბერკეტები, რითაც შეუძლია კრიზისების გადაჭრაო. ჩვენს ინტერესში არ შედის მუდმივ კრიზისში ყოფნა. არსებობს შანსი, რომ ეს კრიზისი დაიძლიოს და ვნახოთ. ასე რომ არ იყოს, მაშინ რა აზრი ჰქონდა მოლაპარაკებებს?