აფხაზეთი და ე.წ. სამხრეთ ოსეთი საფრანგეთში, არაღიარებული ქვეყნების საფეხბურთო ჩემპიონატში მიიღებენ მონაწილეობას

არაღიარებული ქვეყნების ფეხბურთის ასოციაციათა კონფედერაციამ (ConIFA) "ევროპის თასის" მონაწილეთა სია გამოაქვყნა. არაღიარებული ქვეყნების ჩემპიონატს ფეხბურთში 2021 წლის 9 ივნისიდან 19 ივნისამდე ნიცა (საფრანგეთი) უმასპინძლებს. აღნიშნულ ინფორმაციას conifa.org ავრცელებს.

სიაში არიან საქართველოს ოკუპირებული რეგიონების - აფხაზეთისა და ე.წ. სამხრეთ ოსეთის "ნაკრებებიც". ჩემპიონატში მათ გარდა 10 თვითგამოცხადებული რესპუბლიკის ნაკრები მიიღებს მონაწილეობს. ესენია: ნიცის საგრაფო, პადანია, საპმი, დასავლეთ სომხეთი, ჩრდილოეთ კვიპროსი, არცახი (მთიანი ყარაბაღი), სზეკელი, ჩამერია, სარდინია და კორნუოლი.

როგორც ConIFA-ს ვებ-გვერდზეა აღნიშნული, არის ასევე სარეზერვო ნაკრებები - ორი სიცილია, კარპატები და რომას ხალხი. ეს იმ შემთხვევისთვის, თუ რომელიმე ნაკრები ვერ შეძლებს ჩემპიონატში მონაწილეობას.

ჩემპიონატის მონაწილეებს საფრანგეთში გამგზავრებამდე COVID-ტესტების გავლა მოუწევთ.

ცნობისთვის, ConIFA-ს ფიფა არ აღიარებს. ე.წ. სამხრეთ ოსეთისა და აფხაზეთის "ნაკრებები" კი ConIFA-ს ტურნირებში რეგულარულად მონაწილეობენ.

2019 წელს ევროპის არაღიარებული ქვეყნების ჩემპიონატის გამარჯვებული ე.წ. სამხრეთ ოსეთის "ნაკრები" გახდა. 2016 წელს კი ტურნირი აფხაზეთის ტერიტორიაზე გაიმართა და ის მასპინძლების გამარჯვებით დასრულდა.