უმრავლესობის წევრები და მინისტრები მომდევნო სამი თვის ხელფასის 1/3-ს კორონავირუსთან ბრძოლის ფონდში გადარიცხავენ
"ქართული ოცნების" წევრები მოქალაქეებისადმი სოლიდარობის ნიშნად, მომდევნო სამი თვის ხელფასების 1/3-ს ჩარიცხავენ კორონავირუსის წინააღმდეგ შექმნილ ფონდში. ამის შესახებ საპარლამენტო უმრავლესობის წევრმა, „ქართული ოცნების“ აღმასრულებელმა მდივანმა ირაკლი კობახიძემ განაცხადა.
კობახიძის თქმით, მსგავს შენატანს ფონდში სულ 105 ადამიანი განახორციელებს, მათ შორის პარლამენტის უმრავლესობის წევრები და მინისტრები.
"ჩვენი თანამოქალაქეების მიმართ სოლიდარობის გამოსახატად, პარტიაში მიმდინარე დისკუსიისა და კონსულტაციების საფუძველზე, მივიღეთ გადაწყვეტილება, „ქართული ოცნების“ წარმომადგენლებმა საქართველოს პარლამენტსა და საქართველოს მთავრობაში, მთავრობისა და საპარლამენტო უმრავლესობის თითოეულმა წევრმა, მომდევნო სამი თვის განმავლობაში კორონავირუსთან ბრძოლის ფონდში გადავრიცხოთ ჩვენი ხელფასის 1/3.
საჭიროებისამებრ მზად ვართ დამატებითი წვლილი შევიტანოთ ეპიდემიასთან ბრძოლის საქმეში. დარწმუნებული ვართ, ჩვენი პარტიის სხვა წევრებიც, ყველა, ვისაც მიუხედავად რთული ვითარებისა, აქვს შესაძლებლობა, დასაქმებულია კერძო თუ საჯარო სექტორში და აქვს შემოსავალი, ამ შემოსავლისა და სოციალური მდგომარეობის შესაბამისად, განახორციელებენ შენატანებს აღნიშნულ ფონდში და ამით გამოხატავენ სოლიდარობას ჩვენი თანამოქალაქეების მიმართ.
ეპიდემიასთან და მის შედეგებთან ბრძოლაში ჩართული ადამიანების პროფესიონალიზმთან ერთად, სოლიდარობა არის მთავარი რამ, რაც საშუალებას მოგვცემს, პრობლემა დავძლიოთ მინიმალური ზიანით ჩვენი მოქალაქეების ჯანმრთელობისა და კეთილდღეობისათვის,“ - განაცხადა კობახიძემ.
ავტომობილში მგზავრის წინ დასმაზე არსებული შეზღუდვა 22 მაისიდან არ მოიხსნება
LIVE: 360 გრადუსი - ირაკლი კობახიძე
