საქართველოში კორონავირუსით ინფიცირებული იმ პირებიდან, რომლებიც ინფექციურ საავადმყოფოში არიან მოთავსებული, 4 არასრულწლოვანია. ამის შესახებ კლინიკის სამედიცინო დირექტორმა მარინა ეზუგბაიამ ჟურნალისტებს განუცხადა.
მისივე განმარტებით, საქართველოში ახალი კორონავირუსით ინფიცირებული 30 პირიდან მათთან 27 ადამიანი მკურნალობს.
"27 პაციენტიდან 4 პირი არის 14 წლამდე ასაკი“, - აღნიშნა მან. ეზუგბაიას ინფორმაციით, პაციენტებიდან ტემპერატურა მხოლოდ 2 პირს აღენიშნება.
როგორც ცნობილია, საქართველოში კორონავირუსის დაინფიცირებულთა რაოდენობა 30-ს აღწევს. მათგან 2 უკავშირდება ირანში მოგზაურობის ისტორიას, 1 ესპანეთში, დანარჩენი ყველა პირდაპირ ან ირიბად დაკავშირებულია იტალიასთან.
დღეს გახდა ცნობილი, რომ კორონავირუსით ინფიცირებული პირველი პაციენტი გამოჯანმრთელდა. ინფექციური საავადმყოფოს სამედიცინო დირექტორის მარინა ეზუგბაიას თქმით, გუშინ მასთან ტესტირება განმეორდა "კოვიდ 19-ზე" პასუხი უაროფითი მიიღეს.
