როგორ ეხმაურება მსოფლიო მედია ექიმ ვაჟა გაფრინდაშვილის გათავისუფლებას

მსოფლიო მედია საოკუპაციო რეჟიმის მიერ, ქართველი ექიმის, ვაჟა გაფრინდაშვილის გათავისუფლების ფაქტს ეხმაურება. „როიტერსის“ ინფორმაციით, ვაჟა გაფრინდაშვილი რუსეთის მიერ კონტროლირებადი სამხრეთ ოსეთის სეპარატისტულმა მთავრობამ 21 კვირიანი პატიმრობის შემდეგ გაათავისუფლა. მათი ინფორმაციით, აღნიშნულ ტერიტორიაზე ე.წ. „საზღვრის გადაკვეთის ბრალდებით“ საქართველოს მოქალაქეებს ხშირად აკავებენ.

"რადიო თავისუფლების“ ცნობით კი, ქართველი ექიმი დე ფაქტო პრეზიდენტმა, ანატოლი ბიბილოვმა „შეიწყალა“. მათივე ინფორმაციით, ქართველი ექიმი უკანონოდ იყო დაკავებული. გამოშვება ყურადღებას ამახვილებს იმ ფაქტზე, რომ გაფრინდაშვილი თავად რაიმე კანონის დარღვევას უარყოფდა, ამტკიცებდა რა, რომ "სამხრეთ ოსეთი" საქართველოს ტერიტორიაა.

"ნიუ-იორკ თაიმსის" ინფორმაციით, ვაჟა გაფრინდაშვილის გათავისუფლება სეპარატისტული რეჟიმის მხრიდან მოულოდნელი ნაბიჯი იყო. გამოცემის ცნობით, ექიმი, მოსკოვის მიერ კონტროლირებად ტერიტორიაზე, პაციენტის სანახავად გადავიდა.

შეგახსენებთ, ქართველი ექიმი, ვაჟა გაფრინდაშვილი საოკუპაციო რეჟიმის უკანონო პატიმრობიდან დღეს გათავისუფლდა. იგი რუსეთის საოკუპაციო ძალების წარმომადგენლებმა 9 ნოემბერს, ახალგორის რაიონში დააკავეს. ექიმის ოჯახი ვარაუდობს, რომ ვაჟა გაფრინდაშვილს ახალგორში დაშავებული ადამიანისთვის დახმარების გაწევა სურდა.

დე ფაქტო ხელისუფლებამ ვაჟა გაფრინდაშვილს ე.წ. სახელმწიფო საზღვრის განზრახ დარღვევის ბრალდება წაუყენა რუსეთის სისხლის სამართლის კოდექსის 322-ე მუხლით, რომელიც ითვალისწინებს 200 000 რუბლით დაჯარიმებას, ორ წლამდე იძულებით სამუშაოებს, ან ორ წლამდე თავისუფლების აღკვეთას. ე.წ. ლენინგორის სასამართლომ ვაჟა გაფრინდაშვილს ორთვიანი წინასწარი პატიმრობა შეუფარდა.