მამაკაცი, რომელმაც დალი ჩიტალაძის შვილი დაჭრა, დააკავეს

სამართალდამცველებმა დააკავეს მამაკაცი, რომელიც დალი ჩიტალაძის შვილის, ვახო სუთიძის დაჭრაშია ეჭვმიტანილი,ინფორმაციას შსს ავრცელებს. სამინისტროს ცნობით, დაკავებული 1969 წელს დაბადებული, წარსულში ნასამართლევი და ამჟამად პირობითი მსჯავრის ქვეს მყოფი დ.ს.-ა.

როგორც „ინტერპრესნიუსს“ შს სამინისტროდან აცნობეს, გამოძიებით დადგინდა, რომ დაკავებულმა მიმდინარე წლის 8 სექტემბერს თბილისში, თარხნიშვილის ქუჩაზე ცივი იარაღით ჭრილობა მიაყენა 1980 წელს დაბადებულ ვახო სუთიძეს და შემთხვევის ადგილიდან მიიმალა. სუთიძე საავადმყოფოში გადაიყვანეს. მის სიცოცხლეს საფრთხე არ ემუქრება.

სამართალდამცველებმა დ.ს. მომხდარიდან რამდენიმე საათში თბილისში დააკავეს.

პოლიციამ მისი საცხოვრებელი ბინის ჩხრეკისას, დანაშაულის ჩადენის იარაღი - დანა ნივთმტკიცებად ამოიღო.

გამოძიება ჯანმრთელობის განზრახ მსუბუქი დაზიანების ფაქტზე, საქართველოს სსკ-ს 120-ე მუხლის 1-ლი ნაწილით მიმდინარეობს.