მნიშვნელოვანი ინფორმაცია
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"მეორედ მოსვლაც რომ დაემთხვეს, ივანიშვილი ამას მაინც გააკეთებს" - "ოცნების" მორიგი სამთავრობო ცვლილებები და ექსპერტების შეფასება
17:09 / 31-08-2019
შემოდგომა "ოცნების" ხელისუფლებაში ცვლილებით დაიწყება - მმართველმა გუნდმა მთავრობაში საკადრო ცვლილებების განხორციელების გადაწყვეტილება საბოლოოდ მიიღო.
ცვლილებების თანახმად, პრემიერ-მინისტრი მამუკა ბახტაძე წლისა და 2 თვიანი მმართველობის შემდეგ პოსტს დაემშვიდობება და ასპარეზს შს მინისტრს დაუთმობს. გიორგი გახარიას კი მთავარი პოლიციელის პოსტზე პოლიტიკაში მეორედ მოსული ირაკლი ღარიბაშვილი ჩაანაცვლებს.
როგორც "ინტერპრესნიუსს" ინფორმირებულმა პირებმა განუცხადეს, მინისტრთა კაბინეტში ცვლილებების შესახებ განცხადება ოფიციალურად მომავალ კვირას გაკეთდება.
როგორც ცნობილია პრემიერ-მინისტრის გადადგომის შემდეგ გადამდგარად ითვლება მთავრობის სრული შემადგენლობა. კონსტიტუციის თანახმად, ახალ მთვარობას მომავალი პრემიერი დააკომპლექტებს, რომელსაც შემდეგ პარლამენტს წარუდგენს დასამტკიცებლად.
თუ რატომ შეაჩერა არჩევანი ივანიშვილმა გახარიაზე, მაშინ როცა შს მინისტრის გადადგომის მოთხოვნით დედაქალაქში აქციები არ წყდება, პოლიტოლოგებს სხვადასხვა ვერსიები აქვთ. ნაწილი ფიქრობს, რომ მმართველი პარტია ხისტი პოლიტიკის დაწყებას აანონსებს, მეორე ნაწილი კი ფიქრობს, რომ ღარიბაშვილის დაბრუნებით, "ოცნება" ძველი სტაბილურობის დაბრუნებას ცდილობს.
პოლიტიკის ისტორიკოსი გრიგოლ გეგელია მიიჩნევს, რომ ბოლო თვების განმავლობაში ქვეყანაში განვითარებული მოვლენების ფონზე, სამთავრობო ცვლილებები ლოგიკურია:
"დემოკრატიულ ქვეყანაში ასეთ გადაწყვეტილებას მთავრობა იღებს, ამიტომ ხმები სამთავრობო ცვლილებების შესახებ არ გამკვირვებია. უბრალოდ გამიკვირდა, ასე მალე რატომ ცვლიან პრემიერ-მინისტრს, მაშინ როდესაც ერთ წელიწადში ისედაც მოდის საპარლამენტო არჩევნები.
როგორც წესი, ახალ პრემიერს ნიშნავენ არჩევნებამდე რამდენიმე თვით ადრე. არჩევნებში ახალი პრემიერი შეუძღვება პარტიას, როგორც სიის პირველი ნომერი. როგორც ჩანს, სხვა გარემოებაც არის, რის გამოც „ოცნება“ ახლავე ცვლის სამთავრობო შემადგენლობას.
ძალიან ხშირად ჩვენ ვცდილობთ რაციონალურად გავაანალიზოთ ეს ყველაფერი, თუმცა საბოლოოდ ვხვდებით, რომ რეალურად საქმე გვაქვს ივანიშვილის სურვილთან.
პრემიერ-მინისტრის პოსტზე გახარია განიხილებოდა რამდენიმე თვის წინაც და იქამდეც, სანამ ბახტაძე დაინიშნებოდა. მახსოვს, რომ მაშინ საზოგადოების უმეტესობა ველოდით, რომ გახარია იქნებოდა პრემიერ-მინისტრი, მაგრამ მერე დაინიშნა ბახტაძე. იმ დროს მე ჩავთვალე, რომ ეს ყველაფერი ემსახურებოდა ივანიშვილის სურვილს, რომ გახარიასთვის მიეცათ ახალი მანდატი 2020 წლის არჩევნების შემდეგ - თუ არჩევნებს მოიგებდა, პოლიტიკურ ნასუფრალზე არ გამხდარიყო პრემიერი. მას ეს მისცემდა უფრო მეტ გასაქანს.
მაგრამ ახლა თუ გიორგი გახარია უნდა გახდეს პრემიერი, მაშინ უფრო დამაბნეველი ხდება და ახლაც შეიძლება მივდიოდეთ ივანიშვილის პირად სურვილამდე - თუ ივანიშვილს ასე სურს, ასე მოხდება. არმაგედონი და მეორედ მოსვლა რომ დაემთხვეს, ივანიშვილი ამას მაინც გააკეთებს", - უთხრა AMBEBI.GE-ს გრიგოლ გეგელიამ.
პოლიტოლოგის თქმითვე, შინაგან საქმეთა მინისტრის პოსტზე ირაკლი ღარიბაშვილის შესაძლო დანიშვნით, „ოცნება“ ძველი სტაბილურობის დაბრუნებას ცდილობს, ეს რამდენად გამოუვა ძნელი სათქმელია.
ანალიტიკოს ვახტანგ ძაბირაძის აზრით კი, ამ ცვლილებებით, ხელისუფლება საზოგადოებას გააფრთხილებს, რომ არავის არაფერი შეეშალოს:
"როდესაც ღარიბაშვილი ხელმეორედ გამოჩნდა პოლიტიკაში, მაშინაც ითქვა, რომ იგი ასევე დაბრუნდებოდა შს მინისტრის პოსტზე. მაშინ ყველაფერი აქეთ მიდიოდა, მაგრამ 20-21 ივნისს მოვლენებმა ხელი შეუშალეს ამას. როდესაც ამაზე დაიწყო საუბარი, მაშინვე ითქვა, რომ "ქართული ოცნება" შედარებით ლიბერალური პოლიტიკიდან ხისტ პოლიტიკაზე გადადის. ეს უნდა ყოფილიყო ამ ცვლილებების ლაივ-მოტივი. როგორც ჩანს, ახლა უკვე ჩათვალეს, რომ შესაძლებელია ამ ცვლილებების განხორციელება.
ეს მაჩვენებელია იმისა, რომ ხელისუფლება გადადის უფრო ხისტ პოლიტიკაზე, როგორც ოპონენტების, ისე საზოგადოების მიმართ
რა შედეგებს მოუტანს ეს „ქართულ ოცნებას“, ძნელი სათქმელია. ყოველ შემთხვევაში, როგორი ხისტი პოლიტიკაც არ უნდა აწარმოოს მმართველმა ძალამ, თუ ამ გადაადგილებას არ მოჰყვა რაღაც ცვლილებები ქვეყანაში და ეს არ იქნება რეალური და ხელშესახები, მაშინ არც არაფრის მომტანი არ იქნება.
ის აქცია, რომლის დარბევაც 20 ივნისს ღამეს მოხდა, ქართულმა საზოგადოებამ და ოპოზიციამ სწორად არ გაიაზრა. მაშინ ამ აქციის დარბევა დაკავშირებული იყო 2020 წლის არჩევნებთან. დღეს ამ ხალხის დაწინაურება იქნება კიდევ ერთი გაფრთხილება ხელისუფლების მხრიდან, რომ არავის არაფერი შეეშალოს 2020 წელს.
გულწრფელად რომ გითხრათ, ამას ოპოზიციის უპასუხისმგებლო ნაბიჯებმაც შეუწყო ხელი. ზოგ-ზოგიერთმა დროზე ადრე მოინდომეს რაღაც ნაბიჯების გადადგმა, არ დაელოდნენ პოლიტიკური ვითარების მომწიფებას. თუმცა, ვნახოთ შეიძლება ხელისუფლებას მართლა აღმოაჩნდეს სკივრში გადამალული, რაღაც არაჩვეულებრივი გეგმა, რომლითაც შეძლებს საკუთარი თავის რეაბილიტაციას და ამომრჩევლების უკან მობრუნებას.
ასეთი ცვლილებები წინა ხელისუფლების დროსაც განხორციელდა - 2012 წელს, როდესაც პრემიერი გახდა მერაბიშვილი, ხოლო შს მინისტრის პოსტი ბაჩო ახალაიამ დაიკავა. თუმცა, მაშინ „ნაციონალურ მოძრაობას“ ამ ცვლილებებმა ვერ უშველა. „ოცნების“ შემთხვევაში კი, ეს ცოტა ხანში გამოჩნდება" - განუცხადა AMBEBI.GE ძაბირაძემ.
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
ენტონი ფაუჩი მიმართვას ავრცელებს - "აიცერი, თუ არ ხარ აცრილი და მიიღე "ბუსტერ" დოზა, თუ უკვე აცრილი ხარ"
მნიშვნელოვანი ინფორმაცია
მკითხველის რჩევით
