9 წლის დაჩი გულუას წერილი, რომელიც რამდენიმე დღის წინ, ბიჭის დედამ - ნათია ანასტასიადმა გამოაქვეყნა "ფეისბუქის" პირად გვერდზე, სოციალურ ქსელში სწრაფად გახდა პოპულარული.
სკოლის მოსწავლე წერილით შს მინისტრს, გიორგი გახარიას მიმართავს და სთხოვს, რომ საგზაო ნიშნებზე კაცების გამოსახულებასთან ერთად, ქალის გამოსახულებაც გაჩნდეს.
"ბატონო გიორგი, მე ვარ დაჩი გულუა, 9 წლის. შევამჩნიე რომ, ყველა საგზაო ნიშანზე კაცის ფიგურაა გამოსახული. ვფიქრობ რომ, ეს ქალების შეუმჩნეველი დაჩაგვრაა. ქალაქში ფეხითაც და მანქანითაც ქალები და კაცები ერთნაირად დადიან, ამიტომ გთხოვ, საგზაო ნიშნებზე ქალის ფიგურაც გამოსახოთ" - წერდა დაჩი გულუა გახარიასადმი გაგზავნილ წერილში.
წერილმა მინისტრამდე მიაღწია და დღეს შს სამინისტროში მინისტრ გახარიასა და სკოლის მოსწავლე დაჩი გულუას შეხვედრაც შედგა. შეხვედრის ამსახველ ფოტოს ბიჭუნას დედა ავრცელებს მინაწერით: "ძალიან საქმიანი და პროდუქტიული შეხვედრა გამოვიდა! დაჩი კმაყოფილია..."
სავარაუდოდ, სამინისტრო ყურადღებიანი მოქალაქის მიმართვას გაითვალისწინებს და მალე საგზაო ნიშნებზე ქალების გამოსახულებაც გამოჩნდება...
