ბიძინა ივანიშვილის შემდეგ ირაკლი კობახიძე - საარჩევნო ბანერები ბათუმიდან

თბილისის შემდეგ, ბიძინა ივანიშვილი საარჩევნო ბანერებზე ბათუმშიც გამოჩნდა. თუმცა, ზღვისპირა ქალაქში "ქართული ოცნების" თავმჯდომარის გარდა ბილბორდებზე პარლამენტის თავმჯდომარეს ირაკლი კობახიძესაც იხილავთ.

"ქართული ოცნების" მხარდაჭერილი საპრეზიდენტო კანდიდატის მხარდამჭერი ახალი ბანერები თბილისსა და ბათუმში გუშინ გამოჩნდა.

სალომე ზურაბიშვილის ნაცვლად, ბილბორდებზე ბიძინა ივანიშვილია გამოსახული, საარჩევნო სლოგანი კი ასეთია - "პრინციპული არჩევანი". ბანერებზე ასევე წერია ფრაზა - "ღირსება, თავისუფლება, განვითარება". ირაკლი კობახიძის შემთხვევაში კი ბანერზე არის ფრაზა "არა დიქტატურას, აირჩიე თავისუფლება".

მეორე ტურისთვის სრულიად განახლდა სალომე ზურაბიშვილის საარჩევნო ბანერებიც, შეცვლილია ხელისუფლების მიერ მხარდაჭერილი კანდიდატის ფოტოები და სლოგანი - ფრაზა "ერთად საქართველოსთვის" ახალი დევიზით - "პრინციპული არჩევანი" ჩანაცვლდა.

განმარტება იმაზე, თუ რატომ არის გამოსახული სალომე ზურაბიშვილის საარჩევნო ბანერებზე ბიძინა ივანიშვილი, დღეს მთავრობის თავმჯდომარემაც გააკეთა:

„ქართული ოცნება“ და მისი პოლიტიკური გუნდი მხარს უჭერს დამოუკიდებელ საპრეზიდენტო კანდიდატ სალომე ზურაბიშვილს. შესაბამისად, თითოეული ჩვენგანი, მათ შორის პარტიის დამფუძნებელიც, ბატონი ბიძინა ივანიშვილიც აქტიურად მონაწილეობს საარჩევნო კამპანიაში. ამაში განსაკუთრებული არაფერია“, - განაცხადა პრემიერმა მამუკა ბახტაძემ.

ფოტო: მარიკო კეკელიძე