ინდონეზიაში, მიწისძვრისა და ცუნამისგან დაზარალებულ რაიონებში 90-ზე მეტი მძარცველი დააკავეს

ინდონეზიაში, მიწისძვრისა და ცუნამისგან დაზარალებულ რაიონებში სამართალდამცველებმა 90-ზე მეტი მძარცველი დააკავეს. ამის შესახებ პოლიციის ოფიციალურმა წარმომადგენელმა სერიო ვასისტომ განაცხადა.

„ყველა ბოროტმოქმედი ქალაქ პალუში დააკავეს. ისინი იჭრებოდნენ საკვებისა და სასმელი წყლის საწყობებში, ძარცვავდნენ მაღაზიებს, აყაჩაღებდნენ ბანკომატებს. პოლიცია მათ წინააღმდეგ ძალიან მკაცრად იმოქმედებს“, - განაცხადა ვასისტომ.

7,4 მაგნიტუდის სიმძლავრის მიწისძვრა ინდონეზიაში 28 სექტემბერს მოხდა, მოგვიანებით კი 360 აფტერშოკი დაფიქსირდა. ძლიერმა მიწისქვეშა ბიძგებმა ცუნამი გამოიწვია. ბოლო მონაცემებით, სტიქიის შედეგად დაიღუპა 1558 ადამიანი, უგზო-უკვლოდ დაკარგულებად 113 ადამიანი ითვლება, დაშავებულთა რაოდენობა კი 2500-ს აღწევს.