ნაძალადევის რაიონში, სკოლის მოსწავლეებს შორის მომხდარი ჩხუბის თვითმხილველები ყვებიან, რომ დაპირისპირებისას, შემთხვევის ადგილზე დაახლოებით 40-მდე მოზარდი იმყოფებოდა.
როგორც კერძო სკოლა "პეგასის" თანამშრომლებმა "ინტერპრესნიუსთან" საუბრისას განაცხადეს, მოსწავლეები მე-12 სკოლის ეზოში იყვნენ შეკრებილი.
თვითმხილველებისთვის უცნობია, მოსწავლეები კონკრეტულად რომელი სკოლების მოსწავლეები იყვნენ.
ამასთან, სკოლა "პეგასის" თანამშრომლების თქმით, სიტუაციაში დროულად ჩაერთო მე-12 სკოლის მანდატურის სამსახური და სწორედ მან გამოიძახა საპატრულო პოლიცია.
ნახეთ ვიდეო: "ამომიყვანეს ეს ბავშვი ნაცემი" - ნაძალადევის მე-12 საშუალო სკოლის დირექტორი
მოსწავლეებს შორის დაპირისპირებაზე გამოძიება დაწყებულია. როგორც შსს-ში აცხადებენ, პირველადი ინფორმაციით, სკოლის მოსწავლეებს შორის მოხდა ინციდენტი, რა დროსაც ერთ-ერთმა მოსწავლემ მიიღო სხეულის დაზიანება და გადაყვანილია საავადმყოფოში. გამოძიება სსსკ-ს 126-ე მუხლის მე-2 ნაწილით მიმდინარეობს.
