რატომ ვერ მოახერხეს მსურველებმა Aerosmith-ის კონცერტის ბილეთების ყიდვა
ლეგენდარული ამერიკული როკჯგუფის Aerosmith-ის კონცერტზე დასასწრები ბილეთები tkt.ge-სა და Biletebi.ge-ზე 3 საათში სრულად გაიყიდა. თუმცა ამ პროცესს აჟიოტაჟის გარეშე არ ჩაუვლია. ორივე კომპანიამ დაანონსებულ დროს, 25 თებერვლის 9:00-ზე დაიწყო ბილეთების გაყიდვა. ორივე პორტალს ჰქონდა ჩართული რიგის სისტემა, თუმცა Biletebi.ge-ზე გაყიდვა შეფერხებით მიმდინარეობდა.
სოციალურ ქსელებში აქტიურად ვრცელდებოდა ფოტოები, სადაც ჩანდა, რომ Biletebi.ge-ზე რიგი შეფერხებით გადიოდა და მსურველები რამდენიმე საათს ანდომებდნენ ბილეთის შეძენას. აქვე აღსანიშნავია, რომ მხოლოდ რიგი არ იყო პრობლემა. მომხმარებლების ნაწილს, რომელსაც ეგონა, რომ ბილეთი იყიდა და თანხა ჩამოეჭრა, გარკვეული პერიოდის შემდეგ ტრანზაქცია გაუუქმდა და ეს თანხა უკან დაუბრუნდა ანგარიშზე.
ამ ყველაფრიდან გამომდინარე მომხმარებლების მხრიდან Biletebi.ge-ს მიმართ უკმაყოფილება წამოვიდა. ფბ-კომენტარებში ბევრმა ის არასასიამოვნო გამოცდილებაც გაიხსენა, როცა Biletebi.ge UEFA-ს სუპერთასის ბილეთებს ყიდდა და ფაქტობრივად, იგივე სიტუაცია იყო, რაც Aerosmith-ის შემთხვევაში.
Aerosmith-ის კონცერტის ორგანიზატორი არის Black Sea Arena, სადაც 10 000 მაყურებელი ეტევა. აღნიშნულმა ორგანიზატორმა ორივე კომპანიის საიტზე გადაწყვიტა ბილეთების გაყიდვა. 6000-მდე ბილეთი უნდა გაეყიდა tkt.ge-ს, 2 500 - Biletebi.ge-ს. დანარჩენი კი ტურისტულ სააგენტოებს და Aerosmith-ის ფანკლუბს გადაეცა, ნაწილი უცხოურ საიტებზე გაიყიდა. tkt.ge-ს მსგავსი მასშტაბის კონცერტის მომსახურების გამოცდილება უკვე ჰქონდა, რადგან 2016 წელს არენაზე გამართული კონცერტებისთვის ანალოგიურ მომსახურებას სწორედ ეს კომპანია აწარმოებდა. Biletebi.ge-ს კი მსგავსი გამოცდილება არ ჰქონდა. გაყიდვის დაანონსებიდან ბილეთების გაყიდვის დღემდე საკმარისი დრო იყო იმისთვის, რომ ორივე კომპანია სათანადოდ მომზადებულიყო.
AMBEBI.GE შეფერხების მიზეზების გარკვევას შეეცადა და ორივე კომპანიის წარმომადგენელს დაუკავშირდა.
როგორც კომპანიის ივენთ-მენეჯერი გვანცა დეისაძე ამბობს, Biletebi.ge-ზე სწრაფად გაიყიდა არსებული კვოტა, თუმცა დაუკმაყოფილებელი მომხმარებლების რიგის დაშლას დასჭირდა გარკვეული პერიოდი.
"ჩვენ დაახლოებით 2 საათში მოვახერხეთ ბილეთების სრული გაყიდვა. თუმცა გაყიდვის დასრულების შემდეგ რიგის დაშლა მაშინვე არ ხდება. ჯერ გამოდის შეტყობინება, რომ ყველა ბილეთი გაყიდულია და 1-2 საათში ხდება რიგის სრული დაშლა. ეს ხდება იმიტომ, რომ ყველა კლიენტმა მოასწროს ნახვა, თუ რატომ იშლება რიგი. ჩვენს შემთხვევაში, ჯერ გამოვიდა შეტყობინება, რომ 300 ბილეთია დარჩენილი, შემდეგ გაყიდვების დასრულების შესახებ," - განმარტავს Biletebi.ge-ს ივენთ-მენეჯერი გვანცა დეისაძე.
"მომხმარებლებს მართლაც უწევდთ რიგში დაახლოებით 1 საათი დგომა. მიზეზი ბილეთების შეძენის მსურველთა დიდი რაოდენობა იყო. გვყავდა დაახლოებით 8 000 მომხმარებელი, რეალურად კი ბილეთების რაოდენობიდან გამომდინარე მხოლოდ 500-700 მომხმარებლის მოთხოვნის დაკმაყოფილება შეგვეძლო. სოციალურ ქსელში გაჟონა ელექტრონული რიგის გვერდის ავლის ბმულმა. ამის შედეგად საიტზე არასანქცირებულად შევიდა ბევრი მომხმარებელი და მოხდა ადგილების მასიური დაბლოკვა. აღნიშნულმა, თავის მხრივ, გამოიწვია ე.წ. "შოპინგკალათში" ბილეთების დამატების შეზღუდვა. პრობლემა დაახლოებით 15 წუთში აღმოვფხვერით. ამ პროცესის შედეგად გამოვლინდა 14 მომხმარებელი, ვისაც თანხა ჩამოეჭრა და ბილეთები არ მიუღიათ. მათთან კომუნიკაცია შედგა და კუთვნილი ბილეთებით დაკმაყოფილდებიან. ზოგადად, კი ჩვენი საიტი ნამდვილად გამართულია და მზად არის ასეთი მოთხოვნის პირობებში გამართულად იმუშაოს. ამის შემდეგ BILETEBI.GE-ზე გამოყოფილი კვოტა სრულად იყო რეალიზებული," - დასძენს დეისაძე.
რაც შეეხება tkt.ge-ს წარმომადგენლის პოზიციას, ღონისძიებების მენეჯერის მარიამ მორგოშიას ინფორმაციით, ერთადერთი პრობლემა ბილეთების მცირე რაოდენობა იყო, რომელიც მალე გათავდა:
"40 წუთში ბილეთების დიდი ნაწილი უკვე გაყიდული გვქონდა, 3 საათში კი ბილეთები აღარ გვქონდა. წუთში დაახლოებით 200 მომხმარებელს ვემსახურებოდით. ცხელი ხაზი გამართულად მუშაობდა 08:30-დან. სოციალურ ქსელშიც ოპერატიულად ვპასუხობდით შეტყობინებებს. ერთადერთი პრობლემა ის იყო, რომ ბილეთები ცოტა იყო, მალე გათავდა და მსურველების დიდი ნაწილი ბილეთის გარეშე დარჩა. ზოგადად, ჩვენი საიტი ტექნიკურად სრულად გამართულია. რიგის სისტემა შეფერხებების თავიდან არიდებაში ძალიან გვეხმარება. ამ მიმართულებით უკვე საკმაოდ დიდი გამოცდილება გვაქვს და სამომავლოდ ევროპაში ვაპირებთ გასვლას. საზღვარგარეთ გაგვიცნეს უკვე და ვგეგმავთ, რომ ბილეთების გაყიდვა უცხოეთშიც დავიწყოთ," - განმარტავს tkt.ge-ს მორგოშია.
შეგახსენებთ, რომ Aerosmith-ის კონცერტი მისი გამოსამშვიდობებელი ტურნეს ფარგლებში 20 მაისს შეკვეთილში, Black Sea Arena-ზე ჩატარდება.
ნანა მღებრიშვილი
AMBEBI.GE
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
ვინ არის შორენა ბეგაშვილის ყოფილი ქმრის მეუღლე, რომელიც უკრაინაში ცნობილი დიზაინერია
