ფინანსური დავალიანების მქონე სტუდენტებთან უნივერსიტეტი დავალიანების რესტრუქტურიზაციის შესახებ შეთანხმდებას გააფორმებს, - ამის შესახებ ინფორმაციას თსუ ავრცელებს. როგორც თსუ-ში განმარტავენ, შესაბამისი ცვლილება რექტორის ბრძანებაში შევა.
"რაც შეეხება სტუდენტთა მოთხოვნას ადმინისტრაციული და აკადემიური რეგისტრაციის ვადების გახანგრძლივების, სწავლის საფასურის გადანაწილების შესახებ, თსუ რექტორმა და ადმინისტრაციამ იმსჯელეს შექმნილ ვითარებაზე. მიღებულია გადაწყვეტილება ცვლილება შევიდეს რექტორის ბრძანებაში, რომლის თანახმადაც ფინანსური დავალიანების მქონე სტუდენტებთან უნივერსიტეტი გააფორმებს შეთანხმებას დავალიანების რესტრუქტურიზაციის შესახებ", - ნათქვამია თსუ-ს განცხადებაში.
ადმინისტრაციული და აკადემიური რეგისტრაციების ვადის გადაწევის შესახებ კომენტარი გააკეთა თსუ სასწავლო პროცესის მართვის დეპარტამენტის უფროსმა დალი კანდელაკმა. მისი თქმით, უნივერსიტეტის ადმინისტრაციაში შემოსულია იმ სტუდენტების განცხადებები, რომლებსაც აქვთ წინა სემესტრების სასწავლო საფასურის დავალიანება.
"ადმინისტრაცია ინდივიდუალურად სწავლობს თითოეულ ასეთ განცხადებას. იმისთვის რომ ამ სტუდენტებს პრობლემები არ შეექმნათ, რექტორმა სასწავლო პროცესის ვადების ბრძანებაში შეიტანა ცვლილება. კერძოდ, ადმინისტრაციული და აკადემიური რეგისტრაცია გახანგრძლივდა 3 ოქტომბრის ჩათვლით", - განაცხადა კანდელაკმა.
ამასთან, ივანე ჯავახიშვილის სახელობის თბილისის სახელმწიფო უნივერსიტეტის რექტორმა გიორგი შარვაშიძემ თსუ-ს აკადემიური საბჭოს წევრებს უნივერსიტეტის სტრატეგიული განვითარების გეგმაზე მუშაობა შესთავაზა, რისთვისაც სპეციალური სამუშაო ჯგუფი შეიქმნება.
რექტორის თქმით, კარი იქნება ღია და ესაა დოკუმენტი, რომელიც ყველამ ერთად უნდა შეიმუშაოს.
"რაც უფრო მეტი იქნება მონაწილე და რაც უფრო მაღალი იქნება საზოგადოებრივი კონტროლი - უკეთესია. რაც უფრო მეტი პროფესიონალი ჩაერთვება ამ საქმეში - უკეთესია. ამიტომ ვთხოვეთ, განსაკუთრებით, საბჭოს იმ წევრებს, ვინც არიან განათლების სპეციალისტები, იურისტები აქტიურად ჩაერთონ. ნაწილი საკითხებისა მიეკუთვნება უნივერსიტეტის კომპეტენციას. სხვა ნაწილი, მაგალითად საკანონმდებლო ცვლილებები, რომლის ინიცირებაც ჩვენგან უნდა მოხდეს. თბილისის სახელმწიფო უნივერსიტეტს ნამდვილად აქვს ინტელექტუალური საშუალება იმისთვის, რომ გახდეს პოზიტიური ცვლილებების კატალიზატორი,"- აღნიშნა გიორგი შარვაშიძემ.
