"არსებობდა კლანური დაპირისპირება, რასაც ყველაფერი შეეწირა" – "აუდიტორია 115" დაიშალა?

სტუდენტური გაერთიანება "აუდიტორია 115"დაიშალა. სტუდენტები ერთი იდეისთვის, განათლების რეფორმისთვის იბრძოდნენ, მაგრამ კლანურ დაპირისპირებას ყველაზე მასშტაბური სტუდენტური გაერთიანება შეეწირა.

Ambebi.ge "აუდიტორია 115"-ის წევრ ლევან ლორთქიფანიძეს დაუკავშირდა, რომელიც აცხადებს, რომ "აუდიტორია 115" არ დაშლილა და სანდრო ცაგარელთან დაპირისპირებასაც უარყოფს.

- მე პირადადად კონფლიქტი არავისთან მქონია, "აუდიტორია 115" არის დიდი სათათბირო სტრუქტურა, რომელშიც შედის ყველა, ვისაც აქვს პროტესტი არსებული განათლების სისტემის წინააღმდეგ, მაგრამ ეს არ ნიშნავს იმას, რომ ყველა ერთ აზრზე ვართ. შესაბამისად, კონფლიქტი რიგ საკითხებთან დაკავშირებით ცხადია არის და იქნება. ვიღაც გამოეთიშება აუდიტორიის მუშაობას, ეს ჩვეულებრივი პროცესია. რაც შეეხება სანდრო ცაგარელს, ჩვენს შორის დიდი განსხვავებაა, მე არ ვარ სამთავრობო კოალიციაში მანდატებისთვის მებრძოლი პარტიის წევრი. სამინისტრომ და პრემიერ-მინისტრმა მოგვატყუა, უარს ამბობს განათლების რეფორმაზე, მაგრამ არიან ადამიანები, ვინც თვლიან, რომ კიდევ არსებობს მოლაპარაკების გზები და ბორჯომის დასალევად კანცელარიის დერეფნებში დადიან. დღეს ვთლით, რომ მოტყუებულები ვართ და უარს ვამბობთ ზედაპირულ მოლაპარაკებებზე, აუდიტორიის ნაწილი, სხვა აზრზზეა და წარმატებებს ვუსურვებ მათ.

- ამბობენ, რომ თქვენს უკან ლადო პაპავა დგას, რომელმაც მამათქვენი დაასაქმა უნივერსიტეტში... იმასაც ამბობენ, რომ ზურგს გია ხუხაშვილი და პაატა ბურჭულაძე გიმაგრებენ...

- მამაჩემი 1986 წლიდან მუშაობს თსუ-ში, ის ხან მუშაა, ხან დარაჯი, ხან ლაბორატორიის უმცროსი თანამშრომელი... შესაბამისად, ის, რომ პაპავამ მამაჩემის დასაქმებით მომისყიდა, სასაცილოა. ბურჭულაძესთან და ხუხაშვილთან გაიგივება, შეურაცხყოფად მიმაჩნია. იმდენად სერიოზული ადამიანი ვარ, რომ ვერცერთი ვერ მმართავს. გიას ვიცნობ, დიდ პატივს ვცემ, მაგრამ აზრთა ბევრ საკითხზე სხვადასხვაობა გვაქვს. პაატა ბურჭულაძე ჩემთვის მიუღებელი და საეჭვო პოლიტიკური პერსონაა.

- ცნობილია, რომ სექტემბერში საპროტესტო აქციებს გეგმავთ, რას აპროტესტებთ?

- ჩვენ ყველაფერი გავაკეთეთ იმისთვის, რომ საარჩევნო ორომტრიალის დროს პროტესტი არ გამოგვეხატა, მაგრამ სხვა გზა არ დაგვიტოვა პრემიერ-მინისტრმა. აგვისტოში არის დაგეგმილი რექტორის არჩევნები და თუ იმ არჩევნებზე გამოკვეთილი კანდიდატი იქნება დარეჯან თვალთვაძე, გავაგრძელებთ პროტესტს. ჩვენთვის მიუღებელია დარეჯან თვალთვაძის კანდიდატურა რექტორის პოზიციაზე, ის მხოლოდ იმ ხალხს მოსწონს, ვინც სისტემის ნაწილია. როგორც მეურნე და საგნების გადამნაწილებელი, შესანიშნავი კანდიდატურაა, მაგრამ როგორც რექტორი მიუღებელია.

"აუდიტორია 115"-ის დაშლას ადასტურებს გაერთიანების უკვე ყოფილი წევრი სანდრო ცაგარელი, რომელიც მისი წასვლის მიზეზებს ჩვენთან საუბარში განმარტავს.

- სიმართლეა, მეც დავტოვე აუდიტორია. იქ დარჩა მცირე ჯგუფი, რომელსაც უბრალოდ სახელი დარჩა "აუიტორია 115". რაც დასაწყისში იყო, იმასთან საერთო არ აქვს დღევანდელ აუდიტორიას. წამოსვლის და დაშლის მრავალი მიზეზი არსებობდა, ყურადღება არ ექცეოდა განათლების ძირეულ რეფორმას. არსებობდა კლანური დაპირისპირება, რომელსაც სურდა ჩემი და რამდენიმე წევრის გარიყვა "აუდიტორია 115"-დან, რადგან ჩვენ ვახდენდით აზრის ფორმირებას. როგორც ჩანს, რაღაც ინტერესები დგას ამ ყველაფრის უკან. შეიძლება პოლიტიკური ინტერესებიც არის. რაც უფრო ვუახლოვდებით სექტემბერს, ეს ყველაფერი უფრო ნათელი ხდება. ამ ადამიანების ოცნებაა გაიმეორონ ის, რაც ჩემმა თაობამ 4 წლის წინ გააკეთა. კონკრეტულად ვერავის დავადებ ხელს, მაგრამ ლორთქიფანიძეს მჭიდრო კავშირი აქვს ხუხაშვილთან, ის ყოველდღე მყარ კავშირშია პრეზიდენტთან, ალასანიასთან და ბურჭულაძესთან. ასევე, უნდა შეცვლილიყო 45-ე მუხლი და სწორედ მაშინ როცა უნდა მიეღოთ ეს გადაწყვეტილება, წინა დღით მივიდნენ სამინისტროში "აუდიტორია 115"-ის რამდენიმე წევრი და მოთხოვნები შეცვალეს.

სხვადასხვა მოთხოვნებს აყენებდნენ სამინისტროში და ცდილობდნენ საერთო შეთანხმებამდე არ მივსულიყავით. ასევე, ჩვენი მოძრაობის რამდენიმე წევრი თვითმმართველობის წარმომადგენლებს ჩუმად ხვდებოდა, ჩემთვის მიუღებელია მოძრაობაში ყოფნა, სადაც არის კონსპირაციული შეხვედრები მოწინააღმდეგესთან. რაღაც ინფატილური და კლანური დაპირისპირებაა, რასაც შეეწირა ყველაფერი.

- ლევან ლორთქიფანიძე აცხადებს, რომ თქვენს უკან გია ჟორჟოლიანის პარტიის პოლიტიკური ინტერესები დგას...

- მე ეს არასდროს დამიმალია, რომ სოციალურ-დემოკრატიული პარტიის შექმნაში საკუთარი წვლილი მიმიძღვის, მომიყვანონ ერთი კონკრეტული ფაქტი, როცა აუდიტორია არასწორი მიმართულებით წავიყვანე. მე ვაკრიტიკებდი სახელმწიფო სტრუქტურებს.

უნივერსიტეტში მიმდინარე მოვლენებს აკრიტიკებდა "თავისუფალ სტუდენტთა კავშირის" წარმომადგენელი ნიკოლოზ მეტრეველი. სხვა სტუდენტების მსგავსად მისი ორგანიზაციაც მოითხოვდა განათლების სისტემის რეფორმას. ჩვენთან საუბარში მეტრეველმა აღნიშნა, რომ "აუდიტორია 115"-ის დაშლა სამწუხარო ფაქტია.

- "აუდიტორია 115" შეიქმნა საერთო კოალიციური პროტესტის ფონზე და საკმაოდ ეფექტურად მოქმედებდა გარკვეული პერიოდის მანძილზე. ჩვენ მხარს ვუჭერდით "აუდიტორია 115"-ის ძირითად მოთხოვნებს. ნამდვილად სამწუხარო იქნება, თუ ისინი დაიშლებიან, რადგან ნებისმიერი დაპირისპირება საერთო სტუდენტურ საქმეს აზიანებს. მრჩება შთაბეჭდილება, რომ გარკვეული ადამიანები ცდილობენ სტუდენტური პროტესტი თავიანთი მერკანტილური ინტერესებისთვის გამოიყენონ.

-გავრცელებული ინფორმაციით, თქვენ აქტიურად გადიხართ კონსულტაციებს გარკვეულ ძალებთან ფართო სტუდენტური კოალიციის შესაქმნელად და ემზადებით საპარლამენტო არჩევნებისთვის, მართალია?

- შეხვედრებს მართლაც ვაწარმოებ სტუდენტურ ორგანიზაციებთან და ასევე ცალკეულ სტუდენტებთან, თუმცა ეს არ უკავშირდება საპარლამენტო არჩევნებს. ზოგადად განათლების სფეროში მძიმე ვითარებაა შექმნილი, ეს გასულმა თვეებმა კიდევ უფრო ნათელი გახადა. ჩვენი სახელმწიფო უმნიშვნელოვანესი გამოწვევების წინაშე დგას. დღეს, ჩემი და ჩემი მეგობრების ერთადერთ მიზანს წარმოადგენს - ქვეყანაში სამართლიანობის აღდგენა, ყველა მიმართულებით.

თამარ ბოჭორიშვილი

Ambebi.ge