რუსეთი დღეიდან სირიიდან ძირითადი ძალების გაყვანის პროცესს იწყებს
რუსეთი 15 მარტიდან სირიიდან ძირითადი სამხედრო ძალების გაყვანას იწყებს. "ტასის" ინფორმაციით, ვლადიმერ პუტინმა შესაბამისი განკარგულება უკვე გასცა.
"მიმაჩნია, რომ თავდაცვის სამინისტროს წინაშე დასახული ამოცანები მთლიანად შესრულებულია. ამიტომ, ვბრძანებ, დაიწყოთ ჩვენი ძირითადი სამხედრო ძალების სირიის არაბული რესპუბლიკიდან გაყვანა", - განაცხადა ვლადიმერ პუტინმა რუსეთის თავდაცვის მინისტრ სერგეი შოიგუსთან და საგარეო საქმეთა მინისტრ სერგეი ლავროვთან შეხვედრის დროს.
პუტინი იმედოვნებს, რომ რუსეთის ჯარების სირიიდან გაყვანის დასაწყისი დადებითად აისახება ამ ქვეყნის პოლიტიკურ ძალებს შორის მოლაპარაკებათა პროცესზე.
ვლადიმერ პუტინმა საგარეო საქმეთა მინისტრს სირიაში სამშვიდობო პროცესის ორგანიზებაში ინტენსიური მონაწილეობა დაავალა.
სირიის ავიაბაზა "ჰმეიმიმზიდან" რუსულმა ტექნიკურმა პერსონალმა რუსეთში დაბრუნების პროცესი უკვე დაიწყო. ამის შესახებ რუსული მედია თავდაცვის სამინისტროზე დაყრდნობით იტყობინება.
სამხედრო უწყების თანახმად, პერსონალმა დაიწყო სამხედრო-სატრანსპორტო ავიაციის თვითმფრინავებზე აღჭურვილობისა და მატერიალურ-ტექნიკური საშუალებების გადაზიდვა.
მიუხედავად ამისა, სირიის ტარტუსის პორტსა და "ჰმეიმიმის" აეროდორომზე რუსული ბაზირების პუნქტი კვლავ გააგრძელებს ფუნქციონირებას.
რუსეთმა სირიაში ავიადარტყმები 2015 წლის 30 სექტემბრიდან დაიწყო.
9 წლის გოგონებს ერთი საათით "ათხოვებენ" - ჟურნალისტებმა ერაყში შემზარავი მასალა გადაიღეს
მოსკოვში ხანძარს 4 ბავშვი ემსხვერპლა - "უყურადღებოდ იყვნენ დარჩენილი, რადგან დედა ან მეზობელთან იყო გასული, ან ნასვამს ეძინა"
