მნიშვნელოვანი ინფორმაცია
მნიშვნელოვანი ინფორმაცია
მკითხველის რჩევით
ასევე დაგაინტერესებთ
"ამ წიგნს რომ ხურავთ, გრჩებათ ასეთი რამ: სიყვარული, სიყვარული და ისევ სიყვარული"
07:20 / 25-02-2016
ეს არის წიგნი, რომელიც ნებისმიერი ქვეყნის მოქალაქისთვის ახლობელია. წიგნი, რომელიც საყოველთაო ღირებულებებზე ამახვილებს ყურადღებას. წიგნი, რომელიც 50-ზე მეტ ენაზე ითარგმნა და მსოფლიოს მასტაბით 100 მილიონზე მეტი ეგზემპლარი გაიყიდა. წიგნი, რომელზეც მსოფლიო საუბრობს და რომლის წაკითვის შესაძლებლობა ქართულ ენაზე უკვე ქართველ მკითხველსაც აქვს - ნიკოლას სპარკსის ბესტსელერი - "არჩევანი".
New York times: "სპარქსი ამერიკაშიც და ოკეანის მიღმაც ერთი განსაკუთრებული მიზეზით არის ცნობილი: მწერალი აღწერს ამბებს, რომელშიც უდიდესი გრძნობა - სიყვარული ვლინდება. ამ მხრივ "არჩევანი" მის ნაწარმოებთა შორისაც კი გამორჩეულია".
Washington Post Book World: "სპარქსი ტრადიციას არ ღალატობს - "არჩევანში" სიყვარულსა და ბედისწერას ისე აკავშირებს, რომ ჩვენ წინაშე მარადიული სიყვარულის ამბავი იბადება".
Bestsellers World.com: "ნიკოლას სპარქსს შეუძლია, მარტივი სიუჟეტი ხელოვნების ნიმუშად აქციოს. ავტორს მკითხველი ბოლომდე გვერდით ჰყავს და თავად მოუთხრობს".
ნიკოლას სპარკსის 2007 წელს გამოცემული ბესტსელერის - "არჩევანის" მთარგმნელი ლევან ინასარიძე წიგნზე საუბრისას, პირველ რიგში, ხაზს უსვამს მის გამორჩეულობას ამავე მწერლის სხვა ნაწარმოებებისგან. "არჩევანის" ავტორის დახასიათებისას კი, მის გულწრფელობაზე ამახვილებს ყურადღებას. "სპარკსი მართალი მწერალია, ის არასდროს იტყუება" - ამბობს ინასარიძე და დასძენს: "როგორც ჩვენი ნოდარ დუმბაძე, ნიკოლას სპარკსიც უკვე მომხდარი ამბის მიხედვით წერს რომანს. ეს მართლა მოხდა, ამას ყავს ცოცხალი მოწმეები. მხოლოდ ტოპონიმიკაა შეცვლილი - პერსონაჟების სახელები. მწერალი აფორმებს, რაღაცას ფრთას ასხამს, მოქმედების არეალს ცვლის, სახელებს უცვლის ქალაქებს, მაგრამ ეს არ ნიშნავს ტყუილს. ის არის ძალიან მართალი მწერალი. რომანი "არჩევანი" არც მეტი, არც ნაკლები, თავისი დის თავგადასავალია", - ამბობს ლევან ინასარიძე.
წიგნის მთავარი თემა სიყვარულია. ამაზე ერთხმად თანხმდებიან როგორც მთარგმნელი, ასევე "არჩევანის" ქართული ვერსიის რედაქტორი, მანანა ბალიაშვილი. "რეფრენივით გასდევს მთელ წიგნს: სადამდე შეიძლება წავიდეს ადამიანი სიყვარულის სახელით. ამ წიგნს რომ ხურავთ, გრჩებათ ასეთი რამ: სიყვარული, სიყვარული და ისევ სიყვარული. გიყვარდეთ, ადამიანებო ერთმანეთი, ეს არის მთავარი მესიჯი", - ამბობს რედაქტორი.
მაგრამ ეს არ არის სიყვარულის ბანალური ისტორია. ლევან ინასარიძის თქმით, ნაწარმოებში სიყვარულის ისტორია ორიგინალურადაა შეფუთული: "წიგნი არის ორი ადამიანის სრულყოფილ სიყვარულზე, რომელსაც არანაირი წინაღობა ხელს არ უშლის, სიკვდილის საფრთხის გარდა", - ამბობს ლევან ინასარიძე.
"არჩევანში" ყურადღება გამახვილებულია ამერიკულ კანონმდებლობაზე, სადაც ცოლ-ქმარი დაქორწინებისას ე.წ. სიცოცხლის ანდერძის ხელშეკრულებას დებს. ხელშეკრულებაში განსაზღვრულია, როგორ უნდა მოიქცეს ერთ-ერთი მეუღლე, თუ მეორე ისეთ ვითარებაში აღმოჩნდება, როცა აღარ შეუძლია გადაწყვეტილებების მიღება, არაჯანსაღ მდგომარეობაშია და ა.შ. როგორც მანანა ბალიაშვილი აღნიშნავს, ნაწარმოებში ძალიან საინტერესოდ არის აღწერილი ცოლის მოტივი, რომელმაც ე.წ. სიცოცხლის ანდერძის დადება გადაწყვიტა. ის თავად ექთანია და მის პრაქტიკაში არის გამოცდილება, რომელიც მას ამ ნაბიჯის გადადგმას გადააწყვეტინებს. "ჯერ ძალიან ფოიერვერკული სიყვარული ვითარდება. დიდი სიყვარულით იქმნება ოჯახი და უცბად ტრაგედია ხდება: ქალი, უგონო მდგომარეობაში, აპარატზეა მიერთებული სამი თვის მანძილზე", - აღნიშნავს წიგნის შინაარსზე საუბრისას მანანა ბალიაშვილი.
"აქ სიმბოლურად არის ნახსენები სამი თვე, ეს სწორედ იმ სამ თვეს ეხება, რომელშიც ქმარი კარგავს ცოლს. კარგავს იმიტომ, რომ ცოლი უგონო მდგომარეობაში აღმოჩნდება. მისი ანდერძის მიხედვით, თუ ექიმები სამი თვის მანძილზე ვერ მოიყვანენ გონს, ევთანაზიას უნდა მიმართონ, შეწყვიტონ მკურნალობა. ქმარი დიდი დილემის წინაშე დგას: არჩევანია გასაკეთებელი. დატოვოს ცოლი ცოცხალი, ცოლის ნების საწინააღმდეგოდ, თუ მისცეს ცოლს სიკვდილის უფლება მისივე ანდერძის მიხედვით, რომელსაც მალავს. ეს არის რომანის ძირითადი კვანძი, რომელიც ბოლო გვერდებზე იხსნება" - ამბობს ლევან ინასარიძე.
რაც შეეხება ნაწარმოების ლიტერატურულ მხარეს, ლევან ინასარიძის თქმით, ეს არ არის წიგნი, რომელზეც გაყიდული ეგზემპლარების მიხედვით უნდა ვიმსჯელოთ. მიუხედავად იმისა, რომ მილიონობით გაიყიდა. "ამ წიგნზე ჩვენ აუცილებლად ვმსჯელობთ ტექსტით. ეს არის ძალიან დახვეწილი ინგლისურით დაწერილი წიგნი, რომელსაც გაუგებ თავსაც და ბოლოსაც. ეს არის წიგნი, რომელშიც შეიძლება წაიკითხო ნახევარი გვერდი და ნახევარი საათი ილაპარაკო შემდეგ - გიტოვებს ძალიან ბევრს. სპარკსი ნამდვილი კლასიკოსია. ის არის იმ ძველი სკოლის წარმომადგენელი, რომელსაც ნამდვილი ამერიკული სალიტერატურო სკოლა ერქვა", - ამბობს ლევან ინასარიძე და დასძენს, რომ მწერალმა ლიტერატურაში თავისი სათქმელი უკვე თქვა.
მანანა ბალიაშვილის შეფასებით, ნიკოლას სპარკსის "არჩევანი" ძალიან ადამიანური და უშუალოა. წიგნი მარტივად წასაკითხია. საინტერესოა ფაბულა და მისი განვითარება. მისივე თქმით, წიგნი დიდ მოწონებას დაიმსახურებს ახალგაზრდებში.
"როდესაც ადამიანს არჩევანის გაკეთება მოუწევს, სიკვდილსა და სიცოცხლეს შორის, არჩევანი ყოველთვის სიცოცხლის სასარგებლოდ უნდა გააკეთოს. როგორი წინაპირობაც უნდა იყოს, რაც უნდა იყოს იურიდიულად გაფორმებული, ეს არის მთავარი მესიჯი: დააფასეთ სიცოცხლე. მე მას ვეთანხმები. ჩემი სუბიექტური აზრია: სიცოცხლისთვის ბრძოლა ღირს, თუნდაც ამისთვის კანონი დაარღვიო", - აღნიშნავს "არჩევანის" მთარგმნელი ლევან ინასარიძე და დასძენს, რომ ნაწარმოები წარუშლელ კვალს დატოვებს მკითხველზე.
დაარღვევს თუ არა კანონს მოსიყვარულე მეუღლე, რა გადაწყვეტილებას მიიღებს ის და როგორ განვითარდება მოვლენები, ამას მკითხველი უკვე წიგნიდან შეიტყობს. ნიკოლას სპარკსის "არჩევანის" პრეზენტაცია გამომცემლობა "პალიტრა L"- მა "ბიბლუსი გალერეაში" 24 თებერვალს გამართა.
თამარ კორკოტაშვილი
AMBEBI.GE
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
ენტონი ფაუჩი მიმართვას ავრცელებს - "აიცერი, თუ არ ხარ აცრილი და მიიღე "ბუსტერ" დოზა, თუ უკვე აცრილი ხარ"
მნიშვნელოვანი ინფორმაცია
მკითხველის რჩევით
_2019-10-07_pcZAK5dDPSlBIBs.jpg)
