იანოშ ჰერმანი - ევროკავშირი ყურადღებით აკვირდება "რუსთავი 2"-ის ირგვლივ განვითარებულ მოვლენებს

საქართველოში ევროკავშირის წარმომადგენლობის ხელმძღვანელის იანოშ ჰერმანის განცხადებით, ევროკავშირი ყურადღებით აკვირდება "რუსთავი 2"-ის ირგვლივ განვითარებულ მოვლენებს.

როგორც ჰერმანმა ჟურნალისტებს განუცხადა, მას არაერთხელ უთქვამს, რომ არ შედის კონკრეტული საქმეების დეტალების განხილვაში, თუმცა ესა თუ ის საქმე მნიშვნელოვანია იქედან გამომდინარე, რამდენად შეიძლება მოახდინოს გავლენა პოლიტიკურ ვითარებაზე.

"აღსანიშნავია ის გარემოება, რომ უშუალოდ აღსრულება გადაწყვეტილების, მათ შორის, "რუსთავი 2"-ის მენეჯმენტის შეცვლასთან დაკავშირებით, დაუყოვნებლივ არ დაიწყება. ასევე "რუსთავი 2"-ს აქვს საშუალება, რომ შეიტანოს საჩივარი ამასთან დაკავშირებით და დაველოდოთ ამ პროცესს", - განაცხადა იანოშ ჰერმანმა.

მისივე თქმით, ევროკავშირისთვის მნიშვნელოვანია კანონის უზენაესობის, დემოკრატიისა და მედიათავისუფლების პრინციპების ერთგულება და ამ მიმართულებით ევროკავშირს არაერთი დახმარება გაუწევია საქართველოსთვის.

"მნიშვნელოვანია, არა მარტო შენარჩუნდეს ის მნიშვნელოვანი მიღწევები, რომელიც საქართველოს აქვს დემოკრატიის, კანონის უზენაესობისა და მასმედიის თავისუფლების თვალსაზრისით, არამედ შემდგომი ნაბიჯები გადაიდგას მათი განვითარების მიმართულებით", - აღნიშნა იანოშ ჰერმანმა.