ტუნისში ბათუმის მოცეკვავეთა ანსამბლი გემზეა გაჩერებული

ტუნისში საქართველოს მოქალაქეები, ბათუმის მოცეკვავეთა ანსამბლის წევრები ქალაქის პორტში, გემზე არიან გაჩერებულნი.

ამის შესახებ ინფორმაციას სგარეო საქმეთა სამინისტრო ადასტურებს. უწყების პრეს-სპიკერი განმარტავს, რომ ტუნისში დღეს საქართველოს ელჩი ჩავა, რომელიც ვითარებას ადგილზე გაეცნობა და ქართველების მდგომარეობით დაინტერესდება.

"ტუნისში ამ ეტაპზე ქართველი მეზღვაურები იმყოფებიან, ისინი დიდი ხანია იქ არიან. ხვალ იგეგმება ეგვიპტეში საქართველოს საგანგებო და სრულუფლებიანი ელჩის, არჩილ ძულიაშვილის ვიზიტი ტუნისში. ხვალ ტუნისის დამოუკიდებლობის დღე აღინიშნება და ელჩი უნდა დაესწროს პრეზიდენტის სახელით გამართულ მიღებას. ამ ვიზიტის ფარგლებში ელჩს დაგეგმილი აქვს შეხვედრა ქართველ მეზღვაურებთან და ამ დროის განმავლობაში თუ შემოვიდა ცხელ ხაზზე შეტყობინება, რომ ვინმე საჭიროებს დახმარებას, ბუნებრივია იქნება ადეკვატური რეაგირება", - აცხადებენ საგარეო საქმეთა სამინისტროში.

ტუნისში ბარდოს მუზეუმში მძევლების გათავისუფლების ოპერაციის დროს მომხდარი შეტაკების შედეგად, ბოლო ინფორმაციით, 19 ადამიანია დაღუპული, მათ შორის 17 უცხოელი ტურისტია. ამის შესახებ ინფორმაციას "როიტერი" ქვეყნის პრემიერ-მინისტრზე ჰაბიბ ესიდზე დაყრდნობით აქვეყნებს. მედიასაშუალების ცნობით,

დაღუპულთა შორის არიან ტუნისელი მოქალაქე და პოლიციელი.

"ფრანს პრესის" ინფორმაციით კი, დაღუპულთა შორის არიან გერმანიის, იტალიის, პოლონეთისა და ესპანეთის მოქალაქეები.

ტუნისის მუზეუმში მძევლები დღეს ორმა შეიარაღებულმა პირმა აიყვანა. გავრცელებული ინფორმაციით, მძევლების რაოდენობა 20-30 ადამიანს შეადგენდა. პოლიციამ ორივე ტერორისტი გაანადგურა და მძევლები გაათავისუფლა.

მანამდე გავრცელებული ინფორმაციით, დაღუპულთა რიცხვი 9 ადამიანს შეადგენდა.