ძლიერი წვიმისგან სოფელ ბაშში მოსახლეობას სახლები დაეტბორა

ძლიერი წვიმების შედეგად სამტრედიის მუნიციპალიტეტის სოფელი ბაში დაიტბორა. ადიდებულია მცირე მდინარეები, რომლებმაც მოსახლეობის საცხოვრებელი სახლების პირველი სართულები დატბორა.

ადგილობრივების განცხადებით, დახოცილია შინაური პირუტყვი და განადგურებულია ზამთრის მარაგი.

როგორც სოფლის მკვიდრები აცხადებენ, მათ აგროსესხები აქვთ აღებული, რომლის დაფარვას სტიქიისგან მიყენებული ზარალის გამო ვერ შეძლებენ. ისინი დახმარებას ხელისუფლებას სთხოვენ.

"ყოველ გაწვიმებაზე მსგავს მდგომარეობაში ვართ. მას შემდეგ, რაც ავტობანი გაკეთდა, ყველა წყალი სოფელში შემოდის. ყველაფერი, რაც ზამთრისთვის გვქონდა შენახული, განადგურებულია", - აცხადებენ ადგილობრივები.

ძლიერი წვიმების შედეგად პრობლემები შეექმნა სოფელ ჩხენიშისა და სოფელ ეწერის მოსახლეობასაც. ასევე, სამტრედიაში მოუწესრიგებელი სანიაღვრე არხების გამო ქალაქის ცენტრალური ნაწილი დაიტბორა.

"ინტერპრესნიუსი"