გადავა თუ არა ზოგიერთი მედიკამენტი ურეცეპტო წამლების ჯგუფში?
საქართველოს ჯანდაცვის მინისტრი დავით სერგეენკო ფარმაცევტული კომპანიების წარმომადგენლებს ხვდება. შეხვედრა სამინისტროში მიმდინარეობს.
როგორც შეხვედრის დაწყებისას სერგეენკომ აღნიშნა, დღევანდელი შეხვედრის მიზანი და ამოცანაა ეტაპობრივი შეფასება, თუ როგორ მიმდინარეობს წამლის კანონში შესული ცვლილებების სოციალური დანერგვა და იმპლემენტაცია.
"ჩვენ ყურადღებით ვადევნებთ თვალყურს, ჯანდაცვის სამინისტროს წარმომადგენლები ჩართული არიან, ატარებენ მონიტორინგს. ჩემი მოსაზრებაა ვეცადოთ ერთად შევაფასოთ განვლილი ერთი კვირა. ვნახოთ რა არის გამოსასწორებელი, გასაუმჯობესებელი. ჩვენ ამისთვის მზად ვართ. კანონი, რა თქმა უნდა, უნდა შესრულდეს, თუმცა ეს უნდა ხდებოდეს ერთადერთი მოტივაციით - პაციენტისთვის იყოს კონფორტული, უსაფრთხო და ხარისხიანი", - განაცხადა დავით სერგეენკომ.
როგორც შეხვედრაზე ფარმაცევტული ასოციაციის ხელმძღვანელმა განაცხადა, რეცეპტებთან დაკავშირებით კონკრეტული პრობლემები გამოიკვეთა, თუმცა მისი თქმით, სააფთიაქო სექტორი ყველაფერს აკეთებს, რომ პაციენტები არ იყვნენ უკმაყოფილო.
ამასთან, ფარმაცევტთა ასოციაციის ხელმძღვანელი ირინა ჭელიძე მიიჩნევს, რომ უმჯობესი იქნება რიგი წამლები ამ ეტაპზე დროებით მეორე ჯგუფიდან მესამე ჯგუფში, ანუ ურეცეპტოდ გასაცემი წამლების ჯგუფში გადავიდეს.
ამასთან დაკავშირებით ჯანდაცვის მინისტრმა აღნიშნა, რომ აგვისტოს თვეში კონკრეტული ცვლილებები განხორციელდა და გარკვეული წამლები გადავიდა როგორც მესამედან მეორე ჯგუფში, ასევე პირიქითაც.
პირველი სექტემბრიდან ამოქმედდა ახალი რეგულაცია, რომლის მიხედვითაც პირველი და მეორე ჯგუფის წამლები რეცეპტით, ხოლო მესამე ჯგუფის წამლები ურეცეპტოდ გაიცემა.
ქართველი ჟურნალისტის და ამერიკელი დიპლომატის ქორწილი ვაშინგტონში - "ძალიან ბედნიერები ვართ, რომ ვიპოვეთ ერთმანეთი"
უზენაესი სასამართლოს მოსამართლეობის ყოფილი კანდიდატი თამთა თოდაძეზე - "რა ბრიჯიტ ბარდო ესა მყავს, რა აბია ასეთი ნეტავ"
