რიკოთის საუღელტეხილო მონაკვეთზე მოძრაობა თავისუფალია. როგორც "ინტერპრესნიუსს" საქართველოს საავტომობილო გზების დეპარტამენტიდან აცნობეს, რიკოთის საუღელტეხილო მონაკვეთზე მეწყერსაშიში ზონა ამ ეტაპისთვის შემოფარგლულია და მიმდინარეობს პრევენციული სამუშაოები, რაც მოიცავს მთის ფერდობის გაწმენდას მსხვილი ქვებისა და გადმოწოლილი ხეებისაგან.
"აღნიშნული სამუშაოებიდან გამომდინარე საავტომობილო გზის 146-ე კმ-ზე შეზღუდვები 3-5 წუთით წესდება. გაწმენდით სამუშაოებს ალპინისტთა ჯგუფი აწარმოებს, რომელიც გზის მოვლა-შენახვის კონტრაქტორი კომპანიის მიერ არის დაქირავებული", - აცხადებენ დეპარტამენტში.
მათივე ინფორმაციით, მთის ფერდის გაწმენდითი და პრევენციული სამუშაოები ხვალ სრულად დასრულდება.
146-ე კილომეტრზე ავტოტრანსპორტის მოძრაობა ხორციელდება საპატრულო პოლიციის უშუალო ზედამხედველობით და კოორდინაციით.
დამატებითი სამუშაოების აუცილებლობის შემთხვევაში საავტომობილო გზების დეპარტამენტი შესაბამის ღონისძიებებს კვლავ განახორციელებს.