უვადოპატიმრობამისჯილები შიმშილობის დაწყებას აპირებენ

სასჯელაღსრულების დაწესებულებებში ხვალიდან, უვადოპატიმრობამისჯილები შიმშილობას იწყებენ. როგორც "ინტერპრესნიუსს" გლდანის #8 დაწესებულების ორმა პატიმარმა გიორგი გელაძემ და თეიმურაზ შარაშენიძემ აცნობეს, ჯამში პროტესტს 70-მდე უვადოპატიმრობამისჯილი უერთდება.

გიორგი გელაძის თქმით, შიმშილობის აქცია სამი მოთხოვნით იგეგმება.

"ჩვენი მოთხოვნებია: 2012 წლის ამნისტიის კანონის რეალური აღსრულება, რომელიც უვადოპარტიმრობამისჯილებზე არ ასახულა, რაც კანონის ხარვეზის ნათელი მაგალითია, ასევე ვითხოვთ, უვადო პატიმრობისაგან პირობით ვადაზე ადრე გათავისუფლების 25 წლიანი ზღვარის ევროსტანდარტის შესაბამისად დაწევას. ჩვენი მოთხოვნაა ძალაში შესული უკანონო განაჩენების გადახედვის ეფექტური მექანიზმის შექმნა. სანამ ეს მოთხოვნები არ შესრულდება, აქციები არ შეწყდება", - განაცხადა გიორგი გელაძემ.

მისი თქმით, უვადოპატიმრობამისჯილებს ხელისუფლება დიდი ხანია ჰპირდება ზემოთაღნიშნული მოთხოვნების დაკმაყოფილებას, თუმცა ამ დრომდე რეაგირება არ მომხდარა.

პატიმრის თქმით, 9 ივნისს, პატიმრების სოლიდარობის მიზნით, მათი ოჯახის წევრები და ახლობლები საპროტესტო აქციას მთავრობის ადმინისტრაციასთან გამართავენ.

რაც შეეხება შიმშილობის აქციის ორგანიზებას, თეიმურაზ შარაშენიძის თქმით, სხვადასხვა დაწესებულებებში, შიმშილობის აქციის დაგეგმვა, პატიმართა ოჯახის წევრების დახმარებით მოხდა.

"ინტერპრესნიუსი"