დავით კოდუას ცემის ადგილთან ახლოს სათვალთვალო კამერები დამონტაჟებული არ არის

თბილისში, აბაშიძის 52 ნომერთან, სადაც დღეს დავით კოდუა სცემეს, კრიმინალისტებმა მუშაობა უკვე დაასრულეს და ტერიტორია დატოვეს.

ამასთან, როგორც "ინტერპრესნიუსთან" საუბრისას აბაშიძის ქუჩაზე მდებარე რამდენიმე ობიექტის თანამშრომლებმა უთხრეს, როდესაც პოლიცია და სასწრაფო დახმარება მოვიდა, დავით კოდუა უკვე ძლიერად იყო ნაცემი და გონება დაკარგული ჰქონდა.

მათივე ინფორმაციით, დავით კოდუა შვილთან და შვილის ძიძასთან ერთად სილამაზის სალონში იმყოფებოდა. როგორც სალონის თანამშრომლები აცხადებენ, დავით კოდუა სალონის შესასვლელში ტელეფონით საუბრობდა, ცოტა ხანში მათ გაიგეს ხმაური, წივილ-კივილი, ბავშვის ძიძა ყვიროდა; როდესაც გარეთ გამოვიდნენ, დავით კოდუა უკვე ნაცემი იყო, ძირს ეგდო და გონება დაკარგული ჰქონდა.

როგორც სალონის, ასევე მიმდებარე მაღაზიის თანამშრომლები აცხადებენ, რომ მათ არ დაუნახავთ, კონკრეტულად რამდენი ადამიანი დაესხა თავს დავით კოდუას, იყვნენ თუ არა ნიღბებში ან შეიარაღებული.

მათი თქმით, როდესაც მათ ხმაური გაიგონეს და გარეთ გამოვიდნენ, დავით კოდუა უკვე ნაცემი იყო.

ამასთან, აბაშიძის 52-თან ახლოს მდებარე ობიექტების თანამშრომელთა ინფორმაციით, შემთხვევის ადგილთან ახლოს არც ერთი კამერა არ არის დამონტაჟებული.

"ინტერპრესნიუსი"