კალიფორნიული კომპანია Advanced Tactics, Inc საკუთარი ტრანსფორმერის გამოცდას აგრძელებს. უცნაური სატრანსპორტო საშუალება AT Black Knight, რომელიც ერთდროულად ავტომობილისა და შვეულმფრენის შესაძლებლობებს ითავსებს, პირველად აფრინდა ჰაერში. უსაფრთხოებიდან გამომდინარე, პირველი ფრენისას Black Knight (ქართულად "შავი რაინდი") მიწიდან დისტანციურად იმართებოდა.
შერწყმული შესაძლებლობების მქონე სატრანსპორტო საშუალება პენტაგონის პერსპექტიული კვლევების სააგენტო DARPA-ს დაკვეთით შეიქმნა. პროექტი სახელად ARES, სამხედრო დანიშნულების ჰიბრიდული სატრანსპორტო საშუალების შექმნას ითვალისწინებს, რომელიც ფართო სპექტრის ამოცანების გადაჭრას შეძლებს. პერსპექტივაში, "შავი რაინდის" მოვალეობებში რთულად მისადგომ ადგილებში ტვირთის, პირადი შემადგენლობის და ტყვია-წამლის გადატანა, დაჭრილთა ევაკუაცია შევა. სახიფათო მისიების დროს, რისკის შესამცირებლად, პილოტი "შავი რაინდის" მართვას მიწიდან, დისტანციურად განახორციელებს.
მფრინავ ტრანსფორმერს რვა ხრახნი აქვს, რომელთა ფუნქციონირებასაც საბორტო კომპიუტერი აკონტროლებს. 9,5 მ-ის სიგრძის Black Knight მხოლოდ 1995 კგ-ს იწონის. შესაძლებლობებიდან გამომდინარე, მისი გამოყენება არა მხოლოდ სამხედრო, არამედ სამოქალაქო-სამაშველო მიზნებითაც შეიძლება.
მიწაზე მოძრაობისას, ტრანსფორმერ 112 კმ/სთ მაქსიმალურ სიჩქარეს ავითარებს და გადაადგილება უგზოობის დროსაც შეუძლია.
მოამზადა ნუკრი მგელაძემ dailytechinfo.org-ის მიხედვით.
